بروکلین میں بڑا ٹرانسپورٹ منصوبہ، بسیں تیز اور سڑکیں محفوظ بنانے کا اعلان

نیویارک کے میئر زوہران ممدانی نے بروکلین کے مصروف اور خطرناک علاقے لنڈن بولیوارڈ پر نئی بس لینز اور انفراسٹرکچر اپ گریڈ کرنے کا اعلان کر دیا ہے، جس کا مقصد روزانہ سفر کرنے والے ہزاروں شہریوں کو بہتر سہولت فراہم کرنا ہے۔

حکام کے مطابق فاؤنٹین ایونیو سے کنڈیوٹ ایونیو تک اس سڑک کی ازسرِ نو تعمیر کی جائے گی، جس سے روزانہ تقریباً 60 ہزار مسافروں کو تیز اور قابلِ اعتماد بس سروس میسر آئے گی۔ اس منصوبے کے تحت نہ صرف ٹریفک کے بہاؤ کو بہتر بنایا جائے گا بلکہ پیدل چلنے والوں کے لیے بھی سڑک عبور کرنا محفوظ بنایا جائے گا۔میئر ممدانی کا کہنا تھا کہ یہ منصوبہ ان والدین، ملازمین اور عام شہریوں کے لیے ہے جو روزانہ بسوں پر انحصار کرتے ہیں۔ منصوبے کے تحت نئی بس بورڈنگ آئس لینڈز، پیدل چلنے والوں کے لیے درمیانی حصے (میڈین)، اور سگنلز کے ساتھ نئے کراسنگ پوائنٹس قائم کیے جائیں گے تاکہ حادثات میں کمی لائی جا سکے۔ حکام کا کہنا ہے کہ اس سڑک پر اوسطاً ہر چار دن میں ایک شخص ٹریفک حادثے میں زخمی ہوتا ہے، جس کے پیشِ نظر یہ اقدام انتہائی ضروری تھا۔حکام کے مطابق یہ منصوبہ 2026 کے آخر میں شروع ہو کر 2027 تک مکمل کیا جائے گا، جس سے نہ صرف سفر آسان ہوگا بلکہ مقامی آبادی کے لیے محفوظ اور مربوط شہری ماحول بھی فراہم کیا جا سکے گا۔