جنوبی کوریا کی معروف یونیورسٹی کائسٹ نے بین الاقوامی طلبہ کیلئے ماسٹرز اور پی ایچ ڈی کی مکمل فنڈڈ اسکالرشپ کا اعلان کیا ہے، جو ٹیوشن فیس، ماہانہ وظیفہ اور صحت انشورنس پر مشتمل ہوگی۔
یونیورسٹی کے مطابق یہ اسکالرشپ ماسٹرز کیلئے دو سال اور پی ایچ ڈی کیلئے تین سال کی مدت کیلئے دستیاب ہوگی، اور طلبہ کمپیوٹر سائنس، انجینئرنگ، فزکس، کیمسٹری اور بزنس سمیت متعدد شعبوں میں داخلہ لے سکیں گے۔ اسکالرشپ میں مکمل ٹیوشن فیس کے ساتھ ماسٹرز طلبہ کیلئے ماہانہ 3 لاکھ 50 ہزار اور پی ایچ ڈی طلبہ کیلئے 4 لاکھ کورین وون کا وظیفہ بھی شامل ہوگا۔ اہلیت کیلئے امیدوار کو آئی ای ایل ٹی ایس میں 6.5 بینڈ یا ٹوفل آئی بی ٹی میں 83 نمبر حاصل کرنا لازمی ہے، جبکہ کورین شہریت رکھنے والے دوہری شہریت کے حامل افراد اس اسکالرشپ کیلئے اہل نہیں۔ فال 2027 میں داخلے کیلئے درخواستیں 7 جنوری سے 5 فروری 2027 تک قبول کی جائیں گی۔ درخواست دہندگان کو آن لائن فارم کے ساتھ ٹرانسکرپٹس، زبان کے ٹیسٹ کا نتیجہ، پاسپورٹ کی کاپی، مالی وسائل کا بیان اور دو سفارشی خطوط جمع کروانا ہوں گے، جبکہ 80 ڈالر کی غیرواپسی درخواست فیس بھی ادا کرنا ہوگی۔