نیویارک میں ٹرانسپورٹ نظام کو بہتر بنانے کے لیے ممدانی انتظامیہ نے ایک بڑا قدم اٹھاتے ہوئے فلیٹ بش ایونیو کی ازسرِ نو تعمیر کا اعلان کر دیا ہے، جس کا مقصد بسوں کی رفتار تیز کرنا، سفر کو زیادہ قابلِ اعتماد بنانا اور سڑکوں کو محفوظ بنانا ہے۔
یہ منصوبہ فلیٹ بش ایونیو پر لیونگسٹن اسٹریٹ سے گرینڈ آرمی پلازا تک سینٹر میں چلنے والی محفوظ بس لینز کی تعمیر پر مشتمل ہے، جس سے روزانہ سفر کرنے والے تقریباً ایک لاکھ بتیس ہزار مسافروں کو براہِ راست فائدہ ہوگا۔ حکام کے مطابق تعمیراتی کام اپریل کے آخری ہفتے میں شروع ہوگا اور موسم خزاں 2026 تک جاری رہنے کا امکان ہے۔میئر ممدانی کا کہنا ہے کہ یہ منصوبہ عام شہریوں کا قیمتی وقت بچانے کے لیے بنایا گیا ہے، کیونکہ اکثر بسوں کی سست رفتار اور تاخیر لوگوں کے روزمرہ معمولات کو متاثر کرتی ہے۔ اس منصوبے کے تحت نہ صرف بسوں کے لیے مخصوص لینز بنائی جائیں گی بلکہ لوڈنگ زونز، پیدل چلنے والوں کے لیے اضافی جگہ اور دیگر حفاظتی اقدامات بھی شامل ہوں گے۔محکمہ ٹرانسپورٹ کے مطابق اس سے قبل ایسے ہی منصوبوں سے برونکس میں بسوں کی رفتار میں 43 فیصد تک اضافہ اور حادثات میں نمایاں کمی دیکھی گئی ہے۔ فلیٹ بش ایونیو منصوبے کو بھی شہریوں کی سہولت اور محفوظ سفر کے لیے ایک اہم پیش رفت قرار دیا جا رہا ہے، جبکہ ڈرائیورز کو ہدایت کی گئی ہے کہ وہ تعمیر کے دوران متبادل راستے اختیار کریں یا اضافی وقت رکھ کر سفر کریں۔