کینیڈا میں اعلیٰ تعلیم حاصل کرنے کے خواہشمند طلبہ کے لیے بڑی خوشخبری سامنے آئی ہے، جہاں یونیورسٹی آف گوئیلف نے 2026 کے لیے مکمل فنڈڈ ماسٹرز پروگرام کا اعلان کیا ہے، جو فوڈ سسٹمز اور جدید ڈیٹا ٹیکنالوجی پر مبنی ہے۔
یہ پروگرام ڈیٹا سائنس، زراعت اور فوڈ سیکیورٹی کے امتزاج پر مشتمل ہے، جس میں طلبہ کو مشین لرننگ، فوڈ کوالٹی ماڈلنگ اور پوسٹ ہارویسٹ ٹیکنالوجی جیسے شعبوں میں عملی تجربہ فراہم کیا جائے گا۔ اس پروگرام میں سوئٹزرلینڈ کے اداروں کے ساتھ اشتراک بھی شامل ہے، جس سے طلبہ کو بین الاقوامی تحقیق کا موقع ملے گا۔یونیورسٹی کے مطابق منتخب امیدواروں کو ٹیوشن فیس، ریسرچ فنڈنگ اور رہائشی اخراجات کے لیے وظیفہ فراہم کیا جائے گا، تاکہ وہ بغیر مالی دباؤ کے اپنی تعلیم مکمل کر سکیں۔درخواست دینے کے لیے متعلقہ شعبوں میں بیچلر ڈگری لازمی ہے، جبکہ امیدواروں کو سی وی، اسٹیٹمنٹ آف انٹرسٹ اور تعلیمی ریکارڈ جمع کرانا ہوگا۔ درخواستیں ای میل کے ذریعے جمع کرائی جا سکتی ہیں، اور داخلے کا عمل جاری ہے جس کے باعث جلد درخواست دینا ضروری قرار دیا گیا ہے۔ماہرین کے مطابق یہ پروگرام عالمی سطح پر بڑھتے ہوئے فوڈ سیکیورٹی اور موسمیاتی تبدیلی کے چیلنجز سے نمٹنے کے لیے ماہرین تیار کرنے میں اہم کردار ادا کرے گا، اور فارغ التحصیل طلبہ کے لیے عالمی سطح پر کیریئر کے وسیع مواقع پیدا ہوں گے۔