کارٹیئر ویمنز انیشیٹو نے 2027 کے ریجنل ایوارڈز کیلئے درخواستیں کھول دی ہیں، جو دنیا بھر کی ان خواتین کاروباری شخصیات کو سپورٹ کرتا ہے جو اپنے کاروبار کے ذریعے معاشرتی، ماحولیاتی اور معاشی تبدیلی لا رہی ہیں۔ درخواستیں جمع کرانے کی آخری تاریخ 16 جون 2026 مقرر کی گئی ہے۔
یہ عالمی پروگرام ان خواتین انٹرپرینیورز کیلئے ہے جو ایسے جدید کاروباری منصوبے چلا رہی ہیں جن کا مقصد عالمی مسائل کا حل، پائیدار ترقی اور اپنی کمیونٹیز میں مثبت اثر پیدا کرنا ہے۔ اس پروگرام کے ذریعے منتخب خواتین کو عالمی سطح پر پہچان اور ترقی کے مواقع فراہم کیے جاتے ہیں۔کارٹیئر ویمنز انیشیٹو 2006 میں شروع کیا گیا تھا اور اس کا مقصد خواتین کاروباری رہنماؤں کو مضبوط بنانا اور انہیں ایسے پلیٹ فارم فراہم کرنا ہے جہاں وہ اپنے کاروبار کو عالمی سطح پر وسعت دے سکیں۔ ریجنل ایوارڈز مختلف خطوں میں ان کاروباری خواتین کو تسلیم کرتے ہیں جو اپنے کام کے ذریعے نمایاں اثر ڈال رہی ہیں۔پروگرام کے مطابق وہ کاروبار اہل ہوں گے جو سماجی یا ماحولیاتی مسائل کا حل پیش کریں، مالی طور پر پائیدار ہوں، اور ترقی کی صلاحیت رکھتے ہوں۔ اس کے علاوہ ایسے منصوبے بھی ترجیح پائیں گے جو مقامی اور عالمی سطح پر مثبت تبدیلی لا رہے ہوں۔درخواست دینے کیلئے امیدواروں کو آن لائن پلیٹ فارم کے ذریعے فارم جمع کرانا ہوگا، اور ہر کاروبار کیلئے صرف ایک درخواست کی اجازت ہوگی۔ پروگرام میں شفافیت اور میرٹ کو بنیادی حیثیت حاصل ہے۔