امریکی انتظامیہ نے وینزویلا کے فٹ بالر کو بازو پر بنے ٹیٹو کی وجہ سے ملک بدر کر دیا۔
حالیہ رپورٹس کے مطابق وینزویلا کے فٹ بالر جیرس ریئس بیریوس کو امریکا سے ایل سلواڈور بھیج دیا گیا ہے۔ جیرس کے وکیل کے مطابق امریکی حکام نے فٹبالر کے بازو پر ریال میڈرڈ کے ٹیٹو کو دیکھ کر ان پر مجرم گینگ کی رکنیت کا الزام لگایا جبکہ فٹبالر جیرس کا کوئی مجرمانہ ریکارڈ بھی موجود نہیں ہے۔ امریکی میڈیا کے مطابق جیرس ریئس کے وکیل کا کہنا ہے کہ وہ وینزویلا میں حکومت کے خلاف مظاہروں میں شریک رہے ہیں اور اس وجہ سے انہیں گرفتاری کا بھی سامنا کرنا پڑا، جیرس ریئس قانونی طریقے سے امریکا اور میکسیکو کے بارڈر تک پہنچے اور امریکا میں داخل ہوئے۔ جیرس ریئس کی امریکا میں گرفتاری کے بعد ان کی رہائی کے لیے قانونی کارروائی جاری تھی کہ اس دوران انہیں اچانک ایل سلواڈور بھیج دیا گیا جس کے بعد ان کا اپنے وکیل اور گھر والوں سے رابطہ منقطع ہوگیا۔ اس سے پہلے بھی ٹرمپ انتظامیہ مجرمانہ تنظیموں سے تعلق کا الزام لگا کر وینزویلا کے دو سو سے زیادہ شہریوں کو ملک بدر کر چکی ہے۔