گوگل نے بھارت کی رشتہ ایپس پلے اسٹور سے ہٹا دیں
گوگل نے سروس فیس سے متعلق ایک تنازعے کے تناظر میں جمعہ کے روز اپنے پلے اسٹور سے شادی کے لیے رشتہ ڈھونڈنے والی ایپس سمیت 10 بھارتی کمپنیوں کی اپلیکشنز کو ہٹانے کا عمل شروع کر دیا۔میٹریمنی ڈاٹ کام نامی کمپنی کے بانی مروگول جناکرامن نے اس پیش رفت کی تصدیق کرتے ہوئے کہا کہ ان کی کمپنی کی ایپس بھارت میٹریمنی، کرسچن میٹریمی، مسلم میٹریمنی اور جوڑی کو پلے اسٹور سے ہٹا دیا گیا ہے۔ ان کا کہنا تھاہماری ایپس ایک کے بعد ایک ڈیلیٹ ہو رہی ہیں آج بھارتی انٹرنیٹ کے لیے ایک سیاہ دن ہے۔ گوگل نے ایک بلاگ پوسٹ میں کسی کمپنی کا نام لیے بغیر کہا تھا کہ 10 بھارتی کمپنیوں کی جانب سے اسے کی جانے والی ادائیگیاں ایک لمبے عرصے سے التوا کا شکار ہیں۔دوسری بھارتی کمپنیاں اب تک اس کوشش میں تھیں کہ کسی طرح گوگل کو انڈیا میں ان ایپ پیمنٹس پر 11 سے 26 فیصد فیس سروس عائد کرنے سے روکا جائے۔