امریکا میں ایک افسوسناک واقعہ پیش آیا ہے، ریاست الابامہ کے علاقے مارشل کاونٹی میں ایک ماں نے غلطی سے اپنے ہی بیٹے پر کار چڑھا دی۔ سارائی راشیل جیمز نامی عورت اپنے بیٹے کو اسکول لینے گئی تو پرنسپل نے بتایا کہ ان کے بیٹے نے صبح اسکول میں بدتمیزی کی ہے۔یہ بات سننے کے بعد خاتون نے اپنے بیٹے کو سبق سکھانے کا فیصلہ کیا تاکہ وہ آئندہ بدتمیزی والا رویہ اختیار نہ کرے۔راشیل نے اسکول سے تھوڑی دور اپنی کار روکی اور بیٹے کو حکم دیا کہ وہ یہاں سے 8 بلاکس تک پیدل چلتے ہوئے گھر جائے۔اس دوران ماں کار چلاتی بچے کے ساتھ ساتھ سڑک پر جارہی تھی۔ تاہم بچے نے گاڑی کا ہینڈل پکڑ کر دروازہ کھولنے کی کوشش کی۔خاتون نے کار کو وہاں سے تیزی سے نکالنے کی کوشش کی تو بچہ نادانستگی میں گاڑی کہ پچھلی ٹائروں کی زد میں آنے کے باعث زخمی ہوگیا جسے اسپتال میں داخل کرنا پڑا۔پولیس کا کہنا ہے کہ خوش قسمتی سے بچے کو بہت زیادہ چوٹیں نہیں آئیں مگر صورتحال خراب بھی ہوسکتی تھی۔27 سالہ ماں کو پولیس نے گرفتار کرلیا تاہم 50 ہزار ڈالرز کے بانڈ بھرنے پر انھیں رہائی ملی۔ خاتون کو اسپتال میں موجود زخمی بیٹے سے بھی ملنے سے روک دیا گیا ہے۔
