نیویارک،سیاسی و سماجی شخصیت اکرم مرزا واشنگٹن میموریل قبرستان میں سپردِ خاک

معروف سماجی ، سیاسی و کاروباری شخصیت اکرم مرزا کچھ عرصے سے کینسر کے مرض میں مبتلا ہونے کے باعث زیر ِ علاج تھے اور گزشتہ شب اپنے خالق حقیقی سے جا ملے۔ مرحوم  لانگ آئی لینڈ میں واقع محمد مسجد کے بانی تھے جبکہ امریکا میں پاکستان تحریکِ انصاف کے سابق صدر بھی رہے ہیں۔اکرم مرزا کا شمار نہ صرف پی ٹی آئی کے بنیادی رکن اورعمران خان کے قریبی ساتھیوں میں ہوتا تھا بلکہ وہ امریکا میں شوکت خانم کینسرمیموریل ہسپتال کے لئے عطیات دینے اور جمع کرنے والی صاحبِ حیثیت و مخیر شخصیت بھی تھے۔مرحوم کینسر کے مرض میں مبتلا ہونے کے باوجود آخری دم تک شوکت خانم کینسر ہسپتال اور کینسر کے مریضوں کے لئے عطیات دیتے رہے اور فنڈ ریزنگ میں بھی متحرک کردار ادا کرتے رہے۔مرحوم کی نمازِ جنازہ لانگ آئی لینڈ  میں قائم ان ہی کی قائم کردہ محمدی مسجد میں ادا کی گئی جس میں  کمیونٹی کی سیاسی، سماجی ،کاروباری شخصیات نے کثیر تعداد میں شرکت کی ، بعد ازاں مرحوم کو واشنگٹن میموریل قبرستان میں سپردِ خاک کردیا گیا۔پاکستانی امریکن کمیونٹی نے اکرم مرزا کی وفات پر گہرے دکھ اور غم کا اظہار کیا ہے ۔ کمیونٹی قائدین کا کہنا ہے کہ اکرم مرزا کی وفات سے پیدا ہونیوالا خلاءمدتوں پورا نہیں ہوسکے گا۔۔