اقوام متحدہ میں پاکستان کے مستقل نمائندے منیر اکرم اور ان کی ہم منصب ڈاکٹر مٹریس ولیمز نے دونوں ممالک کے درمیان باضابطہ طور پر سفارتی تعلقات قائم کرنے کے لیے ایک مشترکہ اعلامیے پر دستخط کیے۔اس موقع پر سفیر منیر اکرم نے کہا کہ دونوں ممالک کے درمیان سفارتی تعلقات کے باضابطہ قیام سے مالیات، تجارت، سرمایہ کاری، انفارمیشن ٹیکنالوجی جیسے کئی شعبوں میں تعاون کی راہیں کھلیں گی۔منیر اکرم نے کہا کہ یہ دونوں ممالک کے نمائندوں کو مختلف سطحوں پر قریبی اور بامعنی بات چیت کا موقع فراہم کرے گا، جس کا مقصد ایک دوسرے کے تجربات سے استفادہ کرنا ہے۔ انہوں نے کہا کہ وہ سینٹ کٹس اینڈ نیوس کے مستقل مشن کے ساتھ دوطرفہ اور کثیر جہتی فورمز پر مشترکہ دلچسپی کے شعبوں میں نئی شراکت داری کے منتظر ہیں۔اس موقع پر خطاب کرتے ہوئے سینٹ کٹس اینڈ نیوس کی مستقل نمائندہ ڈاکٹر مٹریس ولینز نے تقریب کی میزبانی پر پاکستان مشن کا شکریہ ادا کیا۔انہوں نے کہا کہ پاکستان اور سینٹ کٹس اینڈ نیوس کے درمیان سفارتی تعلقات کا باضابطہ قیام مختلف شعبوں بالخصوص تجارت، سیاحت اور تعلیم میں تعاون کا باعث بنے گا۔