جنوبی کوریا کے اپوزیشن لیڈر قاتلانہ حملے میں بال بال بچ گئے،حملہ آور گرفتار

جنوبی کوریا کے حزب اختلاف کے رہنما لی جے میونگ کی گردن پر چاقو سے حملہ کیا گیا۔ یہ حملہ اس وقت ہوا جب وہ پریس کانفرنس کر رہے تھے۔جے میونگ بوسان کے ایک زیر تعمیر ہوائی اڈے کا دورہ کر رہے تھے جب پریس کانفرنس کے دوران ایک نامعلوم شخص نے ان کی گردن کے بائیں جانب ہتھیار سے حملہ کیا۔ یونہاپ کے مطابق حملہ آور کو موقع سے گرفتار کر لیا گیا۔جاری کردہ تصویر میں  لی جے میونگ زخمی حالت میں زمین پر لیٹے ہوئے دکھائی دے رہے ہیں۔ ایک ہجوم نے انہیں  گھیر رکھا تھا۔ خون بہنے سے روکنے کے لیے ان کے گلے میں رومال رکھا ہوا تھا۔  لی جے میونگ جنوبی کوریا کی ڈیموکریٹک پارٹی کا حصہ ہیں۔ وہ منگل کو زیر تعمیر ہوائی اڈے کی جگہ کا دورہ کرنے پہنچے تھے۔ اس دوران ان پر حملہ کیا گیا۔  حملہ آور کی عمر 50 سے 60 سال کے درمیان تھی۔ اطلاعات کے مطابق وہ آٹوگراف لینے کے لیے لی کے پاس پہنچا۔ پھر اچانک آگے بڑھا اور ان کی گردن پر حملہ کردیا۔ سیکیورٹی اداروں نے فوری کارروائی کا مظاہرہ کرتے ہوئے حملہ آور کو  گرفتار کر لیا ۔