شمالی کوریا کی سرکاری خبر رساں ایجنسی کا کہنا ہے کہ واشنگٹن پیونگ یانگ کے خلاف مخاصمانہ منصوبوں میں شدت لارہا ہے،خلا میں بھی امریکہ کے دوہرے معیارات کارگر ثابت نہیں ہوں گے۔پیونگ یانگ نے امریکی راکٹ کے ذریعے زمین کے مدار میں بھیجے جانے والے جنوبی کوریا کے جاسوسی سیٹیلائٹ کے دفاع سے متعلق واشنگٹن کے دلائل کو مضحکہ خيز قرار دیا ہے۔امریکہ نے شمالی کوریا کے ایک سیٹلائٹ کا معاملہ سلامتی کونسل میں اٹھا کر دنیا کی نظروں میں خود کو رسوا کرلیا ہے۔ شمالی کوریا کا مزید کہنا ہے کہ وہ اسٹریٹیجک خطے منجملہ جزیرہ نمائے کوریا میں پیونگ یانگ مخالف اقدامات کے بارے میں معلومات اکٹھی کرنے کے لئے عنقریب مزید فوجی سیٹیلائٹ خلا میں بھیجے گا۔ پیونگ یانگ نے بارہا تاکیدکی ہےکہ شمالی کوریا صرف اپنے دفاع کے مقصد سے فوجی صلاحیتوں میں اضافہ کر رہا ہے۔