عالمی ادارۂ صحت (WHO) نے غزہ سے متعلق ہنگامی صحت اور امدادی سرگرمیوں کی معاونت کیلئے مصر میں آپریشنز اینڈ لاجسٹکس سپورٹ آفیسر کی نئی بین الاقوامی رضاکارانہ اسامی کا اعلان کر دیا ہے۔
یہ چھ ماہ کی فل ٹائم اسائنمنٹ اقوام متحدہ کے رضاکار پروگرام (UNV) کے تحت پیش کی جا رہی ہے، جس کیلئے درخواستیں 30 جون 2026 تک جمع کرائی جا سکتی ہیں۔عالمی ادارۂ صحت کے مطابق منتخب امیدوار مصر کے شہر العریش میں تعینات ہوگا، جہاں وہ غزہ کیلئے طبی سامان کی نقل و حمل، ذخیرہ اندوزی، خریداری اور ترسیل سے متعلق سرگرمیوں میں معاونت فراہم کرے گا۔ العریش کو رفح بارڈر کراسنگ کے قریب ایک اہم لاجسٹک مرکز سمجھا جاتا ہے، جہاں سے انسانی امداد غزہ منتقل کی جاتی ہے۔اس عہدے پر کام کرنے والا رضاکار طبی سامان کی سپلائی چین، گوداموں کے انتظام، اسٹاک کی نگرانی، لاجسٹک رپورٹنگ اور امدادی شراکت داروں کے ساتھ رابطہ کاری کی ذمہ داریاں انجام دے گا۔ اس کے علاوہ وہ مصری ہلال احمر، اقوام متحدہ کے دفتر برائے رابطہ انسانی امور (OCHA) اور دیگر امدادی اداروں کے ساتھ مل کر سرحد پار امدادی کارروائیوں میں معاونت کرے گا۔اسامی کیلئے درخواست دہندگان کے پاس لاجسٹکس، سپلائی چین مینجمنٹ، بزنس ایڈمنسٹریشن، انجینئرنگ یا متعلقہ شعبے میں کم از کم بیچلر ڈگری اور تین سال کا پیشہ ورانہ تجربہ ہونا ضروری ہے۔ انگریزی اور عربی زبانوں پر عبور لازمی قرار دیا گیا ہے جبکہ اقوام متحدہ، عالمی ادارۂ صحت یا انسانی امدادی تنظیموں کے ساتھ کام کا تجربہ رکھنے والے امیدواروں کو ترجیح دی جائے گی۔اقوام متحدہ کے رضاکار پروگرام کے تحت منتخب امیدوار کو ماہانہ تقریباً 2,457 امریکی ڈالر وظیفہ، 3,500 ڈالر ابتدائی گرانٹ، میڈیکل اور لائف انشورنس، زیر کفالت افراد کیلئے ہیلتھ کوریج اور مختلف تربیتی پروگراموں تک رسائی فراہم کی جائے گی۔