نیویارک کے میئر زہران کوامی مامدانی کے 2-K پروگرام کے لیے سرکاری جِنگل منتخب کرنے کی غرض سے عوامی ووٹنگ کا آغاز کر دیا گیا ہے۔ شہری 3 جون رات 10 بجے تک اپنے پسندیدہ جِنگل کے حق میں ووٹ دے سکیں گے۔
منتظمین کے مطابق برونکس سے تعلق رکھنے والی معروف ریپر کارڈی بی اور واشنگٹن ہائٹس کے مشہور فنکار لن مینوئل مرانڈا نے مقابلے کے پانچ فائنلسٹ امیدواروں جیرالڈ، الیگرا، جان، امانڈا اور میوکی کا انتخاب کیا۔ اس مقابلے کے لیے 300 سے زائد جِنگلز موصول ہوئے تھے۔یہ سرگرمی نیویارک سٹی کے پہلے 2-K پروگرام کے آغاز سے قبل منعقد کی جا رہی ہے، جس کے لیے درخواستوں کا عمل 2 جون سے شروع ہوگا۔ اس پروگرام کا اعلان رواں سال جنوری میں میئر زہران مامدانی اور کیتھی ہوکل نے کیا تھا۔2-K پروگرام کا مقصد دو سال عمر کے بچوں کے لیے مفت، معیاری اور آسان رسائی والی چائلڈ کیئر فراہم کرنا ہے۔ ابتدائی مرحلے میں اس موسم خزاں سے 2,000 مفت نشستیں فراہم کی جائیں گی، جبکہ آئندہ چار برسوں میں اسے تمام اہل خاندانوں تک وسعت دینے کا منصوبہ ہے۔شہری انتظامیہ کے مطابق بیشتر مراکز میں صبح 8 بجے سے شام 6 بجے تک، سال کے 260 دن بچوں کی دیکھ بھال کی سہولت میسر ہوگی، جس سے کام کرنے والے والدین کو نمایاں سہولت حاصل ہوگی۔ ضلع 6، 10، 18، 23 اور 27 کے خاندان 2 جون سے پروگرام کے لیے درخواست دے سکیں گے۔