امریکا سے بے دخل کیے گئے افراد کی پہلی پرواز یوگنڈا پہنچ گئی ہے، جو تیسرے ملک کے معاہدے کے تحت کی گئی نئی پالیسی کا حصہ ہے۔
اس پیش رفت کو ڈونلڈ ٹرمپ انتظامیہ کی سخت امیگریشن حکمت عملی کا تسلسل قرار دیا جا رہا ہے۔رپورٹس کے مطابق اس پرواز میں تقریباً بارہ افراد شامل تھے، جنہیں عارضی طور پر یوگنڈا میں رکھا جائے گا اور بعد ازاں ممکنہ طور پر دیگر ممالک منتقل کیا جا سکتا ہے۔ حکام نے ڈیپورٹ کیے گئے افراد کی شناخت اور قومیت سے متعلق تفصیلات ظاہر نہیں کیں۔یوگنڈا لا سوسائٹی نے اس اقدام پر شدید تنقید کرتے ہوئے اسے “غیر انسانی اور توہین آمیز عمل” قرار دیا ہے اور اعلان کیا ہے کہ اس کے خلاف عدالتوں میں قانونی کارروائی کی جائے گی۔ ناقدین کا کہنا ہے کہ ایسے افراد کو ان ممالک بھیجنا جہاں ان کا کوئی تعلق نہیں، انسانی حقوق کے اصولوں کے خلاف ہے۔ادھر امریکی حکام کا مؤقف ہے کہ یہ اقدامات باہمی تعاون کے تحت کیے جا رہے ہیں، جبکہ یوگنڈا پہلے ہی لاکھوں پناہ گزینوں کی میزبانی کر رہا ہے۔ ماہرین کے مطابق یہ پالیسی عالمی سطح پر مزید تنازعات اور قانونی چیلنجز کو جنم دے سکتی ہے۔