میئر زہران ممدانی نے بتایا ہے کہ 2026 کے فیفا ورلڈ کپ سے نیویارک شہر کو تقریباً 2 بلین ڈالر کا معاشی فائدہ ہوا، جس میں سے 1.3 بلین ڈالر براہ راست سیاحوں کے اخراجات سے آئے۔
حکام کے مطابق ٹورنامنٹ کے دوران شہر کے اسپورٹس بارز میں آمدورفت گزشتہ سال کے مقابلے میں 16 فیصد بڑھ گئی، جبکہ وزیٹرز کے اخراجات سے سیاحت، خوراک اور ریٹیل سمیت مختلف شعبوں میں 12 ہزار سے زائد ملازمتوں کو سہارا ملا۔ رپورٹ کے مطابق نیویارک اور نیوجرسی کے پورے خطے میں ورلڈ کپ سے 3.5 بلین ڈالر کا مجموعی معاشی فائدہ ہوا، جس میں سے 56 فیصد حصہ اور 70 فیصد وزیٹرز کی خرچ شدہ رقم اکیلے نیویارک شہر کو ملی۔ میئر ممدانی نے کہا کہ یہ ثابت ہوگیا کہ عوام کا کھیل عوام ہی کا رہتا ہے، اور شہر نے یہ یقینی بنایا کہ ٹورنامنٹ کا فائدہ صرف اسٹیڈیم تک محدود نہ رہے بلکہ مقامی کاروبار اور محلوں تک پہنچے۔ این وائی سی اکنامک ڈویلپمنٹ کارپوریشن کے مطابق مین ہٹن میں بین الاقوامی ویزا کارڈ کے اخراجات میں 12 فیصد، بروکلین میں 19 فیصد اور کوئنز میں 6 فیصد اضافہ ہوا، جبکہ برونکس اور اسٹیٹن آئی لینڈ میں ہوٹلوں کی مصروفیت میں بھی 6 فیصد اضافہ دیکھا گیا۔ رپورٹ کے مطابق شہری انتظامیہ نے 39 روزہ ٹورنامنٹ کے دوران ایک ہزار سستے ٹکٹس فراہم کیے، 100 سے زائد مفت واچ پارٹیز کا اہتمام کیا اور پانچوں بورو میں 50 سے زائد سڑکوں کو "سوکر اسٹریٹس” میں تبدیل کیا، تاکہ شہری اپنے محلوں میں ہی ٹورنامنٹ کا لطف اٹھا سکیں۔