کینیڈا میں آن لائن پاسپورٹ تجدید سروس تمام اہل بالغ شہریوں کے لیے کھول دی گئی

کینیڈین حکومت نے آن لائن پاسپورٹ تجدید سروس کو کینیڈا میں مقیم تمام اہل بالغ شہریوں کے لیے توسیع دے دی ہے جس سے اب سرکاری دفاتر جائے بغیر گھر بیٹھے ڈیجیٹل طریقے سے پاسپورٹ کی تجدید ممکن ہوگی۔

یہ اعلان 28 جولائی کو وینکوور میں امیگریشن وزیر لینا میٹلیج دیاب نے کیا۔ توسیع شدہ نظام کے تحت اہل درخواست دہندگان اپنی درخواست، تصویر اور ادائیگی سب آن لائن جمع کرا کر پورا عمل مکمل کر سکتے ہیں اور دستاویزات بھیجنے یا سروس کینیڈا سینٹر جانے کی ضرورت نہیں ہوگی۔حکومت کے مطابق یہ سروس خاص طور پر دیہی اور دور دراز علاقوں کے رہائشیوں اور نقل و حرکت میں مشکلات رکھنے والے افراد کے لیے بہت مفید ہوگی۔ اس سے قبل آن لائن تجدید صرف محدود افراد کے لیے دستیاب تھی۔ تاہم روایتی طریقے یعنی میل اور ذاتی حاضری کی سہولت بھی بدستور دستیاب رہے گی۔ یہ اقدام سرکاری خدمات کو جدید اور ڈیجیٹل بنانے کے کینیڈا کے وسیع تر منصوبے کا حصہ ہے۔