امریکی محکمہ انصاف نے جرمن کمپنی بوش (Bosch) کے خلاف برآمدی قوانین کی مبینہ خلاف ورزیوں کے معاملے میں فوجداری کارروائی نہ کرنے کا فیصلہ کیا ہے، جو محکمہ کی کارپوریٹ انفورسمنٹ پالیسی کے تحت قومی سلامتی ڈویژن کی جانب سے اپنی نوعیت کا پہلا فیصلہ قرار دیا جا رہا ہے۔
محکمہ انصاف کے مطابق بوش نے خود ممکنہ خلاف ورزیوں کی بروقت اطلاع دی، تحقیقات میں مکمل تعاون کیا اور مناسب اصلاحی اقدامات کیے، جس کے باعث کمپنی کو استثنائی رعایت دی گئی۔ تاہم کمپنی نے معاملے سے حاصل ہونے والے تقریباً ایک کروڑ 14 لاکھ 30 ہزار ڈالر منافع واپس کرنے پر رضامندی ظاہر کی ہے۔تحقیقات کے مطابق ستمبر 2020 سے ستمبر 2024 کے درمیان بوش کی دو غیر امریکی ذیلی کمپنیوں نے چین کی ٹیلی کمیونی کیشن کمپنی ہواوے اور اس سے منسلک اداروں کو 7 کروڑ ڈالر سے زائد مالیت کی سینسر مصنوعات اور سافٹ ویئر برآمد کیے۔ امریکی حکام کا مؤقف ہے کہ یہ برآمدات امریکی برآمدی قوانین کے تحت مطلوبہ اجازت نامے کے بغیر کی گئیں۔محکمہ انصاف نے کہا کہ کمپنی کے تجارتی تعمیل کے نظام میں خامیاں موجود تھیں جس کے باعث برآمدی قوانین کی خلاف ورزیاں کئی برس تک جاری رہیں۔ بعد ازاں بوش نے اپنی پالیسیوں میں تبدیلیاں کیں، اضافی تعمیل افسران تعینات کیے اور داخلی نگرانی کے نظام کو مضبوط بنایا، جس کے بعد حکومت نے فوجداری مقدمہ نہ چلانے کا فیصلہ کیا۔