واشنگٹن(ویب ڈیسک) امریکی صدر ٹرمپ نے ٹیکس و اخراجات سے متعلق ’’بگ بیوٹی فل بل‘‘ پر دستخط کر دیے، بگ بیوٹی فل بل کسی بھی ملک کی تاریخ کا بہترین قانون ہے جو معاشی ترقی کو آگے لے کر جاتا ہے۔
بگ بیوٹی فل بل پر دستخط کے موقع پر وائٹ ہاوس میں ایک تقریب کا انعقاد کیا گیا جس میں اعلیٰ حکومتی عہدیداروں، فوجی افسران اور ارکانِ کانگریس نے شرکت کی۔ رپورٹ کے مطابق واشنگٹن میں یوم آزادی کی تقریب سے خطاب میں امریکی صدر نے کہا کہ بگ بیوٹی فل بل کسی ملک کی تاریخ کا بہترین بل ہے۔ ان کا کہنا تھا کہ ہم امریکا کو پھر سے عظیم ترین ملک بنائیں گے۔ تقریب سے خطاب میں ڈونلڈ ٹرمپ نے ایران پر حملے سے متعلق دوبارہ بات کرتے ہوئے کہا کہ چند روز قبل امریکی فضائیہ نے ایران میں کامیاب آپریشن کیا، ہم نے امریکا کی طاقت کو بحال کیا ہے۔ ٹرمپ نے کہا کہ افغانستان جانا ہماری تاریخ کا سیاہ ترین دن تھا۔ مزید کہا کہ جو بائیڈن دور میں اکیس ملین افراد غیر قانونی طور پر امریکا میں داخل ہوئے, اب ہمارے بارڈرز پہلے سے زیادہ محفوظ ہیں۔ امریکی فوج سے متعلق ٹرمپ نےکہا کہ میں امریکی بری، بحری اور فضائی فوج سے محبت کرتا ہوں۔ ان کے افسران اور جوانوں کو میرا سلام ہے۔ انہوں نے نیٹو پر امریکی اخراجات کا ذکر کرتے ہوئے کہا کہ پہلے امریکا کا 2 فیصد بجٹ نیٹو پر خرچ ہوتا تھا جو اب 5 فیصد تک بڑھ چکا ہے۔ انہوں نے اسے امریکا کی عالمی قیادت کی بحالی کا مظہر قرار دیا۔ امریکی صدر ڈونلڈ ٹرمپ کا کہنا تھا کہ ون بگ بیوٹی فل بل امریکا کا مستقبل بدل دے گا، امریکی عوام نے ہمیں تاریخی مینڈیٹ دیا ہے۔