شمالی کوریا کے رہنما کم جونگ ان نے ایک بار پھر ایٹمی حملے کی دھمکی دیتے ہوئے کہا ہے کہ ہماری فورسز ہر طرح کے چیلنجز کیلئے تیار ہیں۔شمالی کوریا کے سربراہ کم جونگ ان کا کہنا ہے کہ اگر دشمنوں نے ہمیں جوہری ہتھیار استعمال کرنے کی دھمکی دی تو ہم خود ایٹمی حملہ کردیں گے۔ کم جونگ ان کا ایک بیان میں مزید کہنا تھا کہ شمالی کوریا کے میزائل تجربات فورسز کے عزم اور دشمنوں کو خبردار کرنے کا پیغام ہیں۔ دشمن اگر ہمیں نیوکلئیر ہتھیاروں سے اکسانے کی کوشش کرے گا تو ہم خود جوہری حملہ کردیں گے۔ ہماری فورسز ہر طرح کے چینلجز کے لیے تیار ہیں۔ خیال رہے کہ شمالی کوریا کی جانب سے رواں ہفتے کے آغاز پر بھی میزائل تجربات کیے گئے ہیں جس کی امریکا، جاپان اور جنوبی کوریا نے مذمت کی ہے۔ شمالی کوریا کو جوہری ہتھیاروں سے متعلق اپنی پالیسی کے باعث عالمی پابندیوں کا سامنا ہے۔