حیدرآباد:مرکزی وزیرداخلہ ا ور بی جے پی کے سینئرلیڈرامت شاہ نے کہا ہے کہ تلنگانہ کی حکمران جماعت بی آرایس نے جھوٹی یقین دہانیوں میں ورلڈ ریکارڈقائم کر دیا ہے،عوام اس بات کا فیصلہ کریں کہ انہیں ڈبل انجن کی حکومت کے تحت ترقی چاہئے یا پھر جھوٹے وعدے ۔ گدوال میں جلسہ سے خطاب کرتے ہوئے امت شاہ نے مقامی ترقی کے مسائل کا حوالہ دیتے ہوئے کہاکہ بی آرایس حکومت نے اپنے ساڑھے نو سالہ دورحکومت میں جورالہ جیسے کسی بھی آبپاشی پراجکٹ کومکمل نہیں کیا ہے۔انہوں نے کہاکہ گدوال میں 300بستروں والا اسپتال قائم کرنے کا وعدہ بھی پورا نہیں کیاگیا۔ وزیراعلی کے چندرشیکھرراو کی کار اور کمیشن والی حکومت کو گیراج بھیجنے کی ضرورت ہے۔انہوں نے ضلع میں شیوانندگوڑم اور برہمن۔ویلم جیسے پراجکٹس کی تکمیل کے ایک بھی وعدےکو پورانہ کرنے پر بی آرایس حکومت پر تنقید کی۔انہوں نے کہاکہ نلگنڈہ اربن علاقہ میں 40کروڑروپئے کے ترقیاتی پراجکٹ میں رشوت خوری کی گئی ہے۔اس پراجکٹ کو مرکز نے منظور کیا تھا۔انہوں نے کہا کہ بی جے پی کے برسراقتدارآنے پر 17ستمبر کو سرکاری طورپر یوم آزادی تلنگانہ کی تقریب منائی جائے گی۔