کیلی فورنیا میں امریکی صدر جوبائیڈن اور چینی صدر شی چنگ پنگ کی سان فرانسسکو میں ملاقات ہوئی جس میں دو طرفہ تعلقات اور خطے کی صورتحال پر تبادلہ خیال کیا گیا۔دنیا کی دو بڑی اقتصادی قوتوں کے سربرہان کی ملاقات ایپک سربراہ کانفرنس کی سائیڈ لائنز پر ہوئی۔چین کے صدر شی جن پنگ نے اس موقع پر کہا کہ سپر پاورز کے لیے ایک دوسرے سے منہ موڑنا کوئی آپشن نہیں ہے۔ صدر بائیڈن نے کہا مسابقت کو تنازعات کی طرف نہیں جانا چاہیے۔انہوں نے کہا کہ تصادم کے نتائج ناقابل برداشت ہوتے ہیں، ضروری ہے کہ ہم ایک دوسرے کو سمجھیں۔ ملاقات ایشیا پیسیفک اکنامک کوآپریشن اجلاس کی سائڈ لائن پر ہوئی ہے۔ دونوں رہنماؤں نے سان فرانسسکو میں واقع کنٹری ہاؤس فلولی اسٹیٹ کے باغ میں ایک ساتھ چہل قدمی کی اور کئی موضوعات پر بات چیت کی۔