امریکی محکمہ انصاف نے غیرقانونی ووٹنگ، جعلی رجسٹریشن اور انتخابی دھوکہ دہی کے الزامات میں ملک بھر میں 12 افراد کے خلاف مقدمات کا اعلان کیا ہے، جن میں 3 غیرقانونی تارکین وطن بھی شامل ہیں۔
محکمہ انصاف کے مطابق فلوریڈا کی 75 سالہ کینیڈین شہری کرسٹین ینگ پر الزام ہے کہ اس نے شہریت نہ رکھنے کے باوجود 2022 اور 2024 کے تین وفاقی انتخابات میں ووٹ ڈالا۔ ہیٹی کی شہری ویلری زیڈور، جو عارضی تحفظی حیثیت کی حامل تھیں، نے شہریت کا جھوٹا دعویٰ کرکے ووٹ ڈالنے کا اعتراف کیا۔ کنساس میں نائیجیرین شہری جارج جانسن پر الزام ہے کہ اس نے 2010 میں رجسٹریشن کے دوران جھوٹی شہریت ظاہر کی اور 2024 کے انتخابات میں ووٹ ڈالا۔ نیوجرسی میں جمیکا کے شہری پیٹرک رِیڈ پر الزام ہے کہ اس نے 2012 سے 2024 تک متعدد صدارتی انتخابات میں ووٹ ڈالا اور شہریت کی درخواست میں جھوٹے بیانات دیے، جبکہ وینزویلا کی شہری دانوبس برنات پر بھی اسی نوعیت کے الزامات عائد کیے گئے۔ پنسلوانیا میں ہیٹی کے غیرقانونی تارکین وطن کلف سانون پر جعلی رجسٹریشن فارم جمع کروانے کا الزام ہے، جبکہ میکسیکو کی غیرقانونی تارک وطن دیلیا اوچوا پیریز پر 2022 اور 2024 کے انتخابات میں غیرقانونی ووٹنگ کا الزام ہے۔ ٹرینیڈاڈ اینڈ ٹوباگو اور میکسیکو کے دو مزید شہریوں پر بھی فلاڈیلفیا میں غیرقانونی ووٹنگ کے الزامات عائد کیے گئے۔ ٹیکساس میں میکسیکو کی شہری ایمیلڈا میگالینیس پر 2024 کے انتخابات میں غیرقانونی ووٹنگ کا الزام ہے، جبکہ ہوائی میں فلپائنی شہری برناڈیٹ اکاسو نے میل اِن بیلٹ کے ذریعے غیرقانونی ووٹنگ کا اعتراف کیا۔ یوٹاہ میں امریکی پوسٹل سروس کے سابق اہلکار ڈیمن سیئی پر الزام ہے کہ اس نے رجسٹرڈ ووٹرز کو بھیجے جانے والے تقریباً 300 میل اِن بیلٹ غیرقانونی طور پر ضائع کیے۔ حکام کے مطابق یہ تمام مقدمات ابھی الزامات کی سطح پر ہیں اور تمام ملزمان قانون کے مطابق عدالت میں جرم ثابت ہونے تک بے گناہ تصور کیے جائیں گے۔