گرمی سے بچنا ہوا مشکل، امریکی خاندانوں پر اخراجات کا نیا بوجھ

امریکا میں گرمی کے موسم کے دوران گھروں کو ٹھنڈا رکھنے کے اخراجات میں مسلسل اضافے نے لاکھوں خاندانوں کو مالی دباؤ میں مبتلا کر دیا ہے۔ 

نیشنل انرجی اسسٹنس ڈائریکٹرز ایسوسی ایشن کے ایگزیکٹو ڈائریکٹر مارک وولف کے مطابق رواں موسم گرما میں ایک اوسط امریکی خاندان اپنے گھر کو ٹھنڈا رکھنے کے لیے تقریباً 800 ڈالر خرچ کرے گا، جو 2020 کے مقابلے میں تقریباً 40 فیصد زیادہ اور گزشتہ سال کے مقابلے میں 10.5 فیصد اضافے کے برابر ہے۔مارک وولف نے کہا کہ اگرچہ اسٹاک مارکیٹ میں تیزی اور کارپوریٹ منافع ریکارڈ سطح پر ہیں، لیکن عام امریکی شہری مہنگائی، توانائی کے بڑھتے ہوئے بلوں اور روزمرہ ضروریات کے اخراجات سے پریشان ہیں۔ ان کے مطابق تقریباً 60 فیصد امریکی تنخواہ سے تنخواہ تک زندگی گزار رہے ہیں جبکہ ملک میں کریڈٹ کارڈ قرضہ 1.2 ٹریلین ڈالر سے تجاوز کر چکا ہے۔ ایک اندازے کے مطابق ہر چھ میں سے ایک گھرانہ یوٹیلٹی بلوں کی ادائیگی میں پیچھے رہ گیا ہے۔موڈیز کے اندازوں کے مطابق تیل کی منڈی میں اتار چڑھاؤ کے باعث اوسط خاندان کو گزشتہ چند ماہ میں تقریباً 450 ڈالر اضافی خرچ برداشت کرنا پڑا۔ ماہرین کا کہنا ہے کہ توانائی، صحت، رہائش اور خوراک کے اخراجات میں مسلسل اضافہ متوسط طبقے کے لیے مشکلات بڑھا رہا ہے۔