جشنِ عیدمیلاد النبی کی مناسبت سے نیویارک میں انجمنِ غوثیہ کے زیر ِ اہتمام کونی آئی لینڈ ایونیو سے چالیس واں سالانہ جلوس بر آمد ہواجو اپنے مقررہ روٹ سے ہوتا ہوا مکی مسجد پہنچ کر اختتام پذیر ہوگیا۔بروکلین کی فضائیں درود و سلام سے مہک اُٹھیں۔
سرکارِ دو جہاں ،رحمت اللعاالمین ﷺکی ولادتِ باسعادت کے پندرہ سو سالہ جشن کے موقع پر نیویارک میں انجمنِ غوثیہ انٹر نیشنل کے زیر اہتمام کونی آئی لینڈ ایونیو پر منعقدہ چالیس ویں سالانہ جشنِ عید میلاد النبی کاآغاز تلاوتِ کلام پاک سے کیا گیا۔اس موقع پر انجمن ِ غوثیہ کے بانی پیر سید صفدر حسین شاہ نے درودِ تاج پڑھا اور معروف نعت خواں اصغر چشتی نے بارگاہِ رسالت میں ہدیہ نعت پیش کیا۔جلو س میں شرکت کے لیے آئے عاشقانِ مصطفیٰ کے لیے ناشتے میں نذر و نیاز کا اہتمام کیا گیا اور جشنِ عید میلاد النبی کا کیک کاٹا گیا۔جلوس کی روانگی سے قبل پیر فضیل ایاز قاسمی نے دعا کروائی۔
بعد ازااں سرورِ کونین،حبیب ِ خدا اور خاتم الانبیاء کی آمد کی خوشی میں میلاد النبی کا جلوس ہلکی ہلکی بارش میں علماءِ کرام اور مشائخ کی قیادت میں برآمد ہوا۔سماجی رہنما راجہ رزاق کا کہنا تھا جلوس کے بانیان کو یہ اعزاز حاصل ہوا ہے کہ ان کی تیسری نسل بھی اس کارواں میں شامل ہوگئی ہے۔جلوس میں بروکلین کے قرب و جوار اور دیگر علاقوں سے محباِنِ مصطفیٰ، حمد و ثناء اور نعت خوانان ِنے کثیر تعداد میں شرکت کی اور باگارہِ رسالت میں عقیدت کے پھول نچھاور کیے۔
جلوس کے شرکاء نے میلاالنبی کی مناسبت سے سبز پرچم اٹھا رکھے تھے،جلوس کے عقبی حصے میں خواتین کی بھی کثیر تعداد شریک تھی۔اس موقع پر انجمنِ غوثیہ کے بانی پیر سید صفدر حسین شاہ نے اعلان کیا کہ آئندہ سال 23 اگست کو جلوس منعقد ہوگا جبکہ صفدر شاہ کے بیٹے شیراز شاہ نے تمام معاونین سے اظہار تشکر کرتے ہوئے کہ آئندہ برس انتظامات کو مزید بہتر بنائیں گے۔
اس موقع پر پیر سید فضیل ایاز قاسمی نے سیرت النبی پر روشنی ڈالی۔ان کا کہنا تھا کہ میلاد النبی کا اہتمام کرنا اور منانا ہمارے لیے باعثِ سعادت ہے۔جلوس کے راستوں پر شرکاء کے لیے سبیلوں اور نذر و نیاز کااہتمام کیا گیا۔شرکاءتمام راستےدرووو سلام بھیجا اور نعتیں پڑھتے رہے ۔ جلوس کی بدولت کونی آئی لینڈ کی فضائیں درود و سلام سے مہکتی رہیں ۔ شرکا سے خطاب کرتے ہوئے علما کرام نے کہا کہ کائنات کی ہر شہ رسول اللہ پر درود و سلام بھیجتی ہے۔قبل ازیں جلوس انتظامیہ نے نیویارک پولیس کے ڈپٹی انسپکٹر جوزف وارنرز بچ کو ان کی خدمات پر گلدستہ اور ایوارڈ پیش کیا۔ اس موقع پر پولیس افسر جوزف وارنر کا کہنا تھا کہ اس کمیونٹی سے ہمیشہ پیار محبت ملا ہے۔
جلوس کے راستے پر مختلف کیمپس لگے ہوئے تھے، شربت کی سبیلیں بھی لگائی گئیں اور نذو نیاز کے ساتھ لنگر بھی تقسیم کیا جاتا رہا۔جشنِ عید میلا دالنبی کا جلوس اپنے روایتی روٹ سے گزرتا ہوا ڈٹمس ایونیو سے مڑکر واپس ایونیو ایچ کی جانب گامزن ہوا اور مکی مسجد پہنچ کر اختتام پذیر ہو گیا ۔بعد ازاں مکی مسجد میلاد النبی اور اجتماع کا انعقاد ہوا جس میں عاشقان ِ مصطفیٰ کی کثیر تعداد شریک ہوئی۔معروف نعت خوانوں نے اپنی منفرد آواز ولہن میں نذرانہِ عقیدت پیش کیا۔
اس دوران وقفے وقفے سے علماء کرام نے بھی خطاب کیا۔ان کا کہنا تھا کہ محبت ِ رسولﷺ جہنم سے نجات کی ضامن ہے ۔ا س موقع پر نعت خوانوں نے منقبت سمیت دیگر کلام بھی حاضرین کی سماعتوں کی نذ ر کیے۔انجمنِ غوثیہ کے زیر اہتمام جشنِ عید میلاد النبی کے اختتام پر امتِ مسلمہ کی ترقی و خوشحالی،کامیابی اور دنیا میں امن و امان کے قیام کے لیے خصوصی دعا کروائی گئی۔