امریکا کے شہر نیویارک سمیت ملک بھر میں ہفتہ کے روز ’نو کنگز‘ کے نام سے بڑے پیمانے پر مظاہروں کا انعقاد کیا جا رہا ہے، جہاں منتظمین کے مطابق 50 ریاستوں میں تین ہزار سے زائد مقامات پر تقریبات ہوں گی اور لاکھوں افراد کی شرکت متوقع ہے۔
یہ مظاہرے اس سلسلے کی تیسری کڑی ہیں، جنہیں مختلف تنظیموں کے اتحاد کی جانب سے منظم کیا جا رہا ہے۔ مظاہرین صدر ڈونلڈ ٹرمپ کی پالیسیوں اور اختیارات میں اضافے کی کوششوں کے خلاف احتجاج کر رہے ہیں۔ اس سے قبل گزشتہ برس جون اور اکتوبر میں بھی لاکھوں افراد نے ملک بھر میں ان مظاہروں میں شرکت کی تھی۔منتظمین کے مطابق گزشتہ اکتوبر میں صرف نیویارک شہر میں تقریباً تین لاکھ افراد نے ریلیوں میں حصہ لیا تھا، جبکہ اس بار اس سے بھی زیادہ افراد کی شرکت کی توقع ظاہر کی جا رہی ہے۔ شہر کے پانچوں علاقوں میں مختلف مقامات پر مظاہرے ہوں گے، جن میں مین ہیٹن میں ہونے والا مارچ سب سے بڑا تصور کیا جا رہا ہے جو دوپہر دو بجے شروع ہوگا۔ادھر ریاست مینیسوٹا کے شہر سینٹ پال میں مرکزی اجتماع متوقع ہے، جہاں ایک لاکھ افراد کی شرکت کا اندازہ لگایا گیا ہے۔ اس اجتماع میں معروف گلوکاروں، اداکاروں اور سیاسی شخصیات سمیت مختلف سماجی رہنما بھی شرکت کریں گے، جبکہ یہ مظاہرے امریکا کی موجودہ سیاسی صورتحال کے خلاف ایک بڑی عوامی تحریک کے طور پر دیکھے جا رہے ہیں۔