بنگلہ دیش میں جین زی انقلاب کے بعد ہونے والے پہلے عام انتخابات اور آئینی اصلاحات سے متعلق ریفرنڈم کے لیے ووٹنگ کا عمل مکمل ہو گیا ہے، اور اب ووٹوں کی گنتی جاری ہے۔
قطری نشریاتی ادارے الجزیرہ کے مطابق 13ویں قومی پارلیمانی انتخابات میں ملک کے 300 حلقوں میں سے 299 میں پولنگ مکمل ہوئی، جس کے بعد غیر سرکاری ابتدائی نتائج کے مطابق بنگلہ دیش نیشنلسٹ پارٹی (بی این پی) جماعت اسلامی پر برتری حاصل کر رہی ہے۔ابتدائی غیر سرکاری نتائج میں بی این پی کے وزارتِ عظمیٰ کے امیدوار طارق رحمان ڈھاکا اور بوگرا کی نشستوں پر بڑی قیادت کے ساتھ آگے ہیں، جبکہ جماعت اسلامی کے 16 امیدواروں کی کامیابی کے دعوے بھی سامنے آئے ہیں۔ انتخابات کے دوران ملک بھر کے پولنگ اسٹیشنز پر سخت سیکیورٹی انتظامات کیے گئے تھے تاکہ ووٹنگ پرامن طریقے سے مکمل ہو سکے، تاہم ایک حلقے میں جماعت اسلامی کے امیدوار کے انتقال کے باعث انتخاب ملتوی کر دیا گیا۔ریفرنڈم میں آئینی اصلاحات کی تجاویز شامل تھیں، جن میں انتخابی ادوار کے دوران غیر جانبدار عبوری حکومت کے قیام، دو ایوانی پارلیمان، خواتین کی نمائندگی میں اضافہ، عدالتی خودمختاری کے فروغ اور وزیرِاعظم کے لیے دو مدتوں کی حد مقرر کرنا شامل تھا۔سیاستدانوں اور مبصرین کے مطابق یہ انتخابات بنگلہ دیش کے مستقبل کی سمت متعین کرنے میں اہم کردار ادا کریں گے، اور جین زی انقلاب کے بعد نوجوان ووٹرز نئی قیادت سے شفاف حکمرانی اور معاشی بہتری کی امید رکھتے ہیں۔