پاک فوج اور چین کی پیپلز لبریشن آرمی کے درمیان مشترکہ فوجی مشقوں کا آغاز ہوگیا ہے، جن کا بنیادی محور انسدادِ دہشت گردی آپریشنز ہیں۔
آئی ایس پی آر کے مطابق یہ سالانہ انسدادِ دہشت گردی مشقوں کے سلسلے کی نویں مشق ہے، جو دونوں ممالک کے مضبوط اور دیرینہ تعاون کی مزید ایک نمایاں مثال ہے۔آئی ایس پی آر کا کہنا ہے کہ ان مشقوں کا مقصد دونوں افواج کے درمیان باہمی ہم آہنگی کو فروغ دینا، پیشہ ورانہ مہارتوں میں اضافہ کرنا اور جدید عسکری تقاضوں کے تحت بہترین تجربات اور حکمتِ عملیوں کا تبادلہ کرنا ہے۔ دفاعی شعبے میں پاکستان اور چین کا تعاون پائیدار، مستحکم اور باہمی اعتماد پر مبنی ہے، اور ’وارئیر-IX‘ جیسی مشقیں دونوں ممالک کے مضبوط فوجی تعلقات اور علاقائی امن و استحکام کے مشترکہ عزم کی علامت ہیں۔افتتاحی تقریب نیشنل کاؤنٹر ٹیررازم سینٹر پبی میں منعقد ہوئی، جس میں منگلا کور کے کمانڈر، پی ایل اے ویسٹرن تھیٹر کمانڈ کے ڈپٹی چیف آف اسٹاف میجر جنرل بیان شیاومنگ اور پاکستان و چین کے دیگر سینیئر عسکری حکام نے شرکت کی۔