کونسل آف پیپلز آرگنائزیشن اور امریکن کونسل آف منارٹی وومن نے شہری حکومت کے منصوبے دی پیپلز منی کے لیے ایک اور آگہی سیمینار منعقد کیا۔ شرکاٗ نے مختلف منصوبوں کے لیے تحریری تجاویز دیں جو حکومت کو پیش کی جائیں گی۔
سوک اینگجمنٹ کمیشن کے پروگرام دی پیپلز منی کی اہمیت پر کوپو اور اے سی ایم ڈبلیو کے اشتراک سے کونی آئی لینڈ ایونیو پر ایک اور آگہی سیمینار کا اہتمام کیا گیا جس کا آغاز تلاوتِ کلامِ پاک اور نعتِ رسولِ مقبول ﷺ سے ہوا۔سیمینار میں کوپو کے سربراہ محمد رضوی، اے سی ایم ڈبلیو کی چیئرپرسن بازہ روحی سمیت نوجوان، مرد و خواتین اور بزرگ افراد کی کثیر تعداد شریک ہوئی۔ حاضرین سے خطاب میں بازہ روحی کا کہنا تھا کہ اپنے اپنے علاقوں میں بنیادی ضروریات کی فراہمی کے لیے نشاندہی کریں۔سیمینار میں پانچ پانچ افراد پر مشتمل گروپس تشکیل دیے گئے اور ایک فارم میں ان کی سفارشات اور تجاویز درج کی گئیں۔ کوپو کی ٹیم ممبران عبدل اور فیضان نے شرکا کو حکومتی بجٹ اور شہری منصوبوں پر بریفنگ دی۔ شرکا کو بتایا کہ اس پروگرام کے ذریعے حکومت شہریوں سے یہ جاننا چاہتی ہے کہ کمیونٹیز کو اپنے علاقوں میں کن کن سہولتوں کی ضرورت ہے۔سیمینار میں ہیلتھ فرسٹ کی نمائندہ مہوش فاطمہ نے شرکا کو ریاستی ہیلتھ پروگرام میں انرولمنٹ پر پریزنٹیشن دی اور مختلف سوالوں کے جواب بھی دیے۔سیمینار کے شرکا سے لی گئی تجاویز اور سفارشات شہری حکومت کو جمع کرائی جائیں گی تاکہ متعلقہ علاقوں میں مطلوبہ سہولتیں فراہم کی جاسکیں۔ ان تجاویز پر ووٹنگ کے بعد حکومت مجوزہ پروگرام سے متعلق حتمی فیصلہ کرے گی۔