سعودی عرب کے شہر جدہ میں ’’مکہ سے دنیا تک‘‘ کے سلوگن کے تحت پانچویں حج کانفرنس و نمائش کا آغاز ہوگیا، جو 12 نومبر تک جاری رہے گی۔
چار روزہ اس کانفرنس میں 225 مقررین، 270 نمائش کنندگان اور 143 خصوصی سیشنز شامل ہیں، جن سے شرکا مختلف موضوعات پر علم و تجربہ حاصل کریں گے۔سعودی وزیر حج ڈاکٹر توفیق الربیعہ نے افتتاحی تقریب سے خطاب میں کہا کہ گزشتہ حج سیزن گزشتہ پچاس برسوں میں بہترین رہا۔ انہوں نے بتایا کہ 60 فیصد حج معاہدوں کو حتمی شکل دی جاچکی ہے جبکہ باقی معاہدے آئندہ چار ماہ میں مکمل کرلیے جائیں گے۔ ان کے مطابق مقدس مقامات پر 50 فیصد تیاری مکمل ہے اور باقی ذی القعدہ کے آغاز تک مکمل ہو جائے گی، جب کہ رہائش اور ہوٹلوں کا 70 فیصد سے زیادہ کام مکمل ہوچکا ہے۔ڈاکٹر الربیعہ نے کہا کہ “نسک ایپلی کیشن” مصنوعی ذہانت (AI) کے فیچرز کے ساتھ اپنی خدمات کو ترقی کے نئے مرحلے تک لے جائے گی، جس کا مقصد زائرین کے تجربے کو بہتر بنانا اور فوری سہولت فراہم کرنا ہے۔ انہوں نے بتایا کہ اس ایپ کے صارفین کی تعداد 4 کروڑ سے تجاوز کرچکی ہے۔وزارتِ حج کے ترجمان ڈاکٹر غسان النویمی کے مطابق کانفرنس میں ڈیڑھ لاکھ سے زیادہ افراد کی شرکت متوقع ہے۔ انہوں نے بتایا کہ کانفرنس کی نمایاں خصوصیت “انوویشن زون” ہے، جو مصنوعی ذہانت، پائیدار انجینیئرنگ اور ہجوم کے انتظام سے متعلق جدید ٹیکنالوجی کے ذریعے مستقبل کی خدمات کو اجاگر کرے گا۔یہ کانفرنس سعودی وژن 2030 کے اہداف کے مطابق منعقد کی جارہی ہے، جس کا مقصد عازمینِ حج و عمرہ کو جدید ٹیکنالوجی کے ذریعے زیادہ سہولت، تحفظ اور بہترین خدمات فراہم کرنا ہے۔