مکہ مکرمہ میں پاکستانی مصنوعات کی نمائش کا آغاز ہو گیا، جو فیڈریشن آف پاکستان چیمبرز آف کامرس اینڈ انڈسٹری (FPCCI) اور مکہ چیمبر آف کامرس اینڈ انڈسٹری کے اشتراک سے منعقد کی جا رہی ہے۔
اس نمائش کا مقصد پاکستانی کاروباری اداروں اور سعودی تاجروں کے درمیان براہِ راست تجارتی روابط کو فروغ دینا ہے۔افتتاحی تقریب سے خطاب کرتے ہوئے پاکستان کے قونصل جنرل خالد مجید نے ایف پی سی سی آئی اور مکہ چیمبر کی کاوشوں کو سراہتے ہوئے کہا کہ پاکستانی کمپنیوں کو سعودی خریداروں کے قریب لانا ایک بڑی کامیابی ہے۔ انہوں نے یقین دہانی کرائی کہ جدہ قونصلیٹ دونوں ممالک کے کاروباری تعلقات کو مزید مستحکم بنانے میں ہر ممکن تعاون جاری رکھے گا۔نمائش میں پچاس سے زائد پاکستانی نمائش کنندگان اپنی مصنوعات اور خدمات پیش کر رہے ہیں جن میں خوراک، ٹیکسٹائل، ہوٹل سپلائز، آئی ٹی، اور انجینئرنگ سروسز کے شعبے نمایاں ہیں۔ تقریب میں ایف پی سی سی آئی، مکہ چیمبر کے عہدیداران اور سعودی کاروباری برادری کی ممتاز شخصیات نے شرکت کی۔ یہ نمائش 23 اکتوبر 2025 تک جاری رہے گی، جس کے دوران مختلف تجارتی نشستیں بھی منعقد ہوں گی۔