پولیس افسران پر حملہ ناقابل برداشت ہے، ایرک ایڈمز

نیویارک(ویب ڈیسک) نیویارک سٹی کے میئر ایرک ایڈمز کا کہنا ہے کہ پولیس افسران پر حملہ ناقابل برداشت ہے اور شہر کی سیکیورٹی فورسز کو نشانہ بنانا دراصل قانون پر حملہ ہے۔

میئر ایرک ایڈمز اور پولیس کمشنر جیسیکا ٹِش نے ٹائمز اسکوائر میں دو پولیس افسران پر ہونے والے حملے پر سخت ردعمل ظاہر کیا۔ پولیس کمشنر جیسیکا ٹِش کے مطابق، یہ واقعہ 42ویں اسٹریٹ اور 8ویں ایونیو کے قریب پیش آیا جب افسران ایک مبینہ ڈکیتی کو روکنے کی کوشش کر رہے تھے۔ کمشنر ٹِش نے بتایا کہ حملہ آوروں نے اسکوٹرز، باسکٹ بالز اور دیگر اشیاء سے افسران پر حملہ کیا جسے ایک منظم اور منصوبہ بندی شدہ حملہ قرار دیا گیا۔ پولیس نے پانچ نوجوان مشتبہ افراد کو گرفتار کیا ہے جو وینزویلا کے معروف گینگ "Tren de Aragua” کا ذیلی گروہ ہے۔ گرفتار شدگان کی عمریں 12 سے 19 سال کے درمیان ہیں۔ پولیس نے فوری کارروائی کرتے ہوئے پانچ افراد کو گرفتار کر لیا جن میں سے تین افراد کی شناخت فوراً کر لی گئی۔ میئر ایڈمز نے اس موقع پر کہا پولیس افسران پر حملہ ناقابل برداشت ہے اور شہر کی سیکیورٹی فورسز کو نشانہ بنانا دراصل قانون کی حکمرانی پر حملہ ہے۔ کمشنر ٹِش نے مزید کہا کہ نیو یارک سٹی کونسل کی جانب سے گینگ ڈیٹا بیس کو ختم کرنے کی کوششیں قانون نافذ کرنے والے اداروں کی صلاحیتوں کو کمزور کرتی ہیں۔ ایڈمز نے مزید کہا کہ اگر جرائم میں ملوث افراد کو مناسب سزا نہ دی گئی تو وہ دوبارہ ان وارداتوں کو انجام دے سکتے ہیں۔ انہوں نے اس بات کی وضاحت بھی کی کہ نیو یارک پولیس ڈپارٹمنٹ (NYPD) وفاقی ایجنسیوں کے ساتھ مجرمانہ تحقیقات میں تعاون کرتا ہے مگر شہری امیگریشن نفاذ میں مداخلت نہیں کرتا۔