نیو یاک سٹی کے میئرایرک ایڈمزنے مالی سال 2025 کے منظور شدہ بجٹ پر بیان دیتے ہوئے کہا کہ یہ بجٹ نیویارک شہر کی معاشی بہتری، عوامی تحفظ، اور شہریوں کی زندگی کو بہتر بنانے کی کوششوں میں ایک اہم قدم ہے۔ ایڈمز نے خاص طور پر اس بات پر زور دیا کہ مالی سال 2025 کے بجٹ میں عوامی تحفظ، ابتدائی بچپن کی تعلیم، اور ورکنگ کلاس کے مسائل کو حل کرنے کے لئے مزید سرمایہ کاری کی گئی ہے۔ بجٹ میں مزید پولیس افسران کی بھرتی، تعلیمی پروگرامز، اور ثقافتی سیکٹر کے لئے فنڈنگ شامل ہے۔میئر نے کہا کہ یہ بجٹ نیویارک شہر کی مضبوط مالی پالیسیوں کا نتیجہ ہے، جس کی وجہ سے شہر نے غیر متوقع معاشی ترقی کا فائدہ اٹھایا ہے۔ انہوں نے وفاقی اور ریاستی حکومتوں سے مزید امداد کی اپیل بھی کی تاکہ پناہ گزینوں کے بحران کو بہتر طریقے سے سنبھالا جا سکے۔مئیر نے کہا کہ ہماری انتظامیہ کا مشن واضح ہےکہ عوامی تحفظ کی حفاظت کریں، ہماری معیشت کی تعمیر نو کریں، اور اس شہر کو مزید رہنے کے قابل بنائیں اور یہ بجٹ اس مشن کا براہ راست ثبوت ہے۔انہوں نے کہا کہ ہم نے سٹی کونسل کے ساتھ مل کر چیلنجز کا سامنا کیا، اور اپنے مضبوط مالیاتی انتظام کی بدولت، ہم ایک ایسا بجٹ پاس کرنے کے قابل ہیں جس پر تمام نیویارک کے باشندے فخر کر سکتے ہیں۔
