مغربی افریقی ملک سینیگال میں انتخابات ملتوی ہونے پر ہنگامے پھوٹ پڑے ، ہنگاموں میں ایک شخص جاں بحق ہو گیا ہے۔مغربی افریقی ملک سینگال میں صدارتی انتخابات کے التوا پر ہنگامے پھوٹ پڑے ہیں، دارالحکومت ڈاکار کی سڑکیں میدان جنگ کا منظر پیش کر رہی ہیں۔مظاہرین نے احتجاج کے دوران متعدد گاڑیوں کو آگ لگا دی، جگہ جگہ رکاوٹیں کھڑی کر دی گئی ہیں، پولیس پر پتھراؤ بھی کیا گیا، جب کہ دارالحکومت ڈاکار میں سیکیورٹی فورسز نے ہجوم کو منتشر کرنے کے لیے آنسو گیس اور اسٹن گرینیڈ فائر کیے، شمالی شہر سینٹ لوئس میں پولیس کے ساتھ جھڑپوں میں ایک طالب علم کی موت ہو گئی ہے۔سینگال میں صدارتی انتخابات 25 فروری کو ہونے تھے، لیکن ارکان پارلیمنٹ نے گزشتہ ہفتے اسے 15 دسمبر تک ملتوی کرنے کا بل منظور کر لیا ہے۔اس سے قبل ملک کے صدر میکی سال نے انتخابات کو اس دلیل کے ساتھ غیر معینہ مدت کے لیے ملتوی کر دیا تھا، کہ صدارتی امیدواروں کی اہلیت کے تنازع کو حل کرنے کی ضرورت ہے، تاہم قانون سازوں نے بعد میں 10 ماہ کا التوا منظور کیا۔سیاسی مخالفین اس اقدام کو جمہوریت کے گڑھ سینیگال کی ساکھ کے لیے خطرے کے طور پر تعبیر کر رہے ہیں، حزب اختلاف کے رہنما خلیفہ سال نے انتخابات میں تاخیر کو ’’آئینی بغاوت‘‘ قرار دیا ہے۔