امریکا میں حکومتی بندش کے دوران طویل سیکیورٹی قطاروں سے پریشان مسافروں کے لیے کچھ ریلیف سامنے آیا ہے، جہاں ٹرانسپورٹیشن سیکیورٹی اہلکاروں کو ادائیگیاں شروع ہونے کے بعد ائیرپورٹس پر دباؤ کم ہونا شروع ہو گیا ہے۔
رپورٹس کے مطابق کئی بڑے ائیرپورٹس پر گھنٹوں طویل انتظار میں نمایاں کمی آئی ہے۔ ہیوسٹن کے ایک ائیرپورٹ پر چار گھنٹے تک پہنچنے والی قطار اب چند منٹ تک محدود ہو گئی، جبکہ دیگر مصروف ائیرپورٹس پر بھی صورتحال بہتر دیکھی گئی، اگرچہ بعض مقامات پر ابھی بھی تاخیر برقرار ہے۔یونین حکام کے مطابق اہلکاروں کو جزوی ادائیگی موصول ہوئی ہے جبکہ باقی رقم اگلے ہفتے تک ملنے کی توقع ہے۔ تاہم انہوں نے خبردار کیا ہے کہ صرف تنخواہوں کی ادائیگی سے تمام مسائل حل نہیں ہوں گے، کیونکہ کئی ملازمین پہلے ہی ملازمت چھوڑ چکے ہیں یا مالی مشکلات کا شکار ہیں۔حکام کا کہنا ہے کہ مکمل بہتری میں مزید وقت لگ سکتا ہے کیونکہ مصروف سفری سیزن جاری ہے اور عملے کی کمی اب بھی ایک بڑا مسئلہ ہے۔ دوسری جانب کانگریس میں فنڈنگ کے معاملے پر تاحال ڈیڈلاک برقرار ہے، جس کے باعث محکمہ ہوم لینڈ سیکیورٹی کی بندش ختم ہونے کے آثار فوری طور پر نظر نہیں آ رہے۔