نیویارک سٹی کے میئر ایرک ایڈمز اور نیویارک سٹی پبلک اسکولز کی چانسلر میلیسا ایویلس-راموس نے “برتھ ٹو 2 چائلڈ کیئر انیشی ایٹو” کے لیے اوپن انرولمنٹ کا اعلان کر دیا ہے۔
یہ ایک فنڈڈ ابتدائی تعلیمی منصوبہ ہے جس کے تحت 16 کمیونٹی بیسڈ مراکز پر بچوں کی پیدائش سے لے کر دو سال کی عمر تک کے لیے 200 سے زائد نشستیں خاندانوں کو بلا معاوضہ فراہم کی جائیں گی۔ اس منصوبے کے لیے 10 ملین ڈالر مختص کیے گئے ہیں اور یہ ایڈمز انتظامیہ کی ابتدائی تعلیم کے لیے 167 ملین ڈالر کی مجموعی سرمایہ کاری کا حصہ ہے۔میئر ایرک ایڈمز کے مطابق یہ اقدام ان کمیونٹیز میں بچوں اور خاندانوں کے لیے اعلیٰ معیار کی نگہداشت اور ابتدائی تعلیم کو یقینی بنائے گا جہاں ضرورت سب سے زیادہ ہے۔ انہوں نے کہا کہ چھ ہفتے کے بچوں تک کے لیے نگہداشت کی سہولت فراہم کر کے والدین کو روزگار اور بچوں کی دیکھ بھال کے درمیان انتخاب سے بچایا جا رہا ہے، جس سے نہ صرف بچوں کی مضبوط بنیاد رکھی جائے گی بلکہ خاندانوں پر مالی دباؤ بھی کم ہوگا۔ چانسلر ایویلس-راموس نے اس منصوبے کو نیویارک سٹی میں ابتدائی تعلیم کے ایک نئے دور کا آغاز قرار دیا اور کہا کہ معیاری ابتدائی تعلیم بچوں کو سیکھنے کا بہترین آغاز دیتی ہے۔یہ پروگرام برونکس، سینٹرل بروکلین، اپر مین ہٹن اور ساؤتھ ایسٹ کوئنز کی ان آبادیوں میں شروع کیا جا رہا ہے جن کا انتخاب معاشی ضرورت اور چائلڈ کیئر تک رسائی کے ڈیٹا کی بنیاد پر کیا گیا ہے۔ اس میں شامل ہونے کے لیے کسی آمدنی کی شرط نہیں رکھی گئی، اور چھ ہفتے سے دو سال کی عمر کے بچوں کے والدین براہِ راست متعلقہ فراہم کنندگان سے رابطہ کر کے اندراج کرا سکتے ہیں۔ خدمات کا باقاعدہ آغاز 5 جنوری 2026 سے ہوگا۔