امریکی صدر ڈونلڈ ٹرمپ نے جمعرات کو ایک ایگزیکٹو آرڈر پر دستخط کیے ہیں جس کے تحت مصنوعی ذہانت (اے آئی) سے متعلق ریاستوں کے اپنے قوانین نافذ کرنے پر پابندی لگا دی گئی ہے۔
وائٹ ہاؤس کے مطابق اس اقدام کا مقصد پورے ملک کے لیے “واحد قومی فریم ورک” تیار کرنا ہے تاکہ مختلف ریاستی ضوابط ٹیکنالوجی کی ترقی کو متاثر نہ کریں۔ایگزیکٹو آرڈر کے تحت وفاقی حکومت اور کانگریس مل کر ایک نیا قومی اے آئی فریم ورک تیار کریں گے، جبکہ انتظامیہ کو یہ اختیار بھی دیا گیا ہے کہ وہ ریاستوں کے سخت اور رکاوٹ پیدا کرنے والے قوانین کو روک سکے۔ حکام نے وضاحت کی ہے کہ بچوں کے تحفظ سے متعلق ریاستی قوانین اس پابندی سے مستثنیٰ رہیں گے۔ایوانِ نمائندگان اور سینیٹ نے اس سے قبل کوششوں کو مسترد کر دیا تھا جن کا مقصد ریاستوں کی اے آئی ریگولیشن روکنا تھا۔ ٹیکنالوجی کمپنیوں، خصوصاً سلیکون ویلی کے رہنماؤں کا کہنا ہے کہ مختلف ریاستی قوانین نے جدت اور عالمی مقابلے میں امریکہ کی پوزیشن کمزور کرنے کا خطرہ بڑھا دیا ہے، خاص طور پر چین کے مقابلے میں۔ناقدین کا مؤقف ہے کہ ریاستوں کے اختیارات محدود کرنے سے اے آئی کمپنیوں کو احتساب سے بچنے کا موقع مل سکتا ہے، جبکہ وفاقی سطح پر کوئی جامع قانون اب تک موجود نہیں۔ ماہرین کا کہنا ہے کہ یہ آرڈر عدالتوں میں چیلنج ہوسکتا ہے، کیونکہ بعض ریاستوں نے پہلے ہی اے آئی کے خطرناک استعمالات—جیسے گمراہ کن ڈیپ فیکس اور ملازمت میں امتیازی فیصلے—کو روکنے کے لیے قوانین بنا رکھے ہیں۔