نیویارک(ویب ڈیسک) نیویارک کے علاقے بروکلین میں “براؤنز وِل آرٹس سینٹر اینڈ اپارٹمنٹس” منصوبے کا سنگ بنیاد رکھ دیا گیا ہے۔ اس منصوبے کے تحت 283 نئے سستے کرایہ دار فلیٹس تعمیر کیے جائیں گے۔
میئر ایرک ایڈمز نے ہاؤسنگ ڈپارٹمنٹ کے قائم مقام کمشنر احمد تیگانی، گل بین ڈویلپمنٹ، بلیو سی ڈویلپمنٹ اور آرٹ اسپیس کے ساتھ براؤنز وِل بروکلین میں “براؤنز وِل آرٹس سینٹر اینڈ اپارٹمنٹس” منصوبے کا سنگ بنیاد رکھ دیا۔ اس منصوبے کے تحت 283 نئے سستے کرایہ دار فلیٹس تعمیر کیے جائیں گے، جو 30 سے 70 فیصد ایریا میڈین انکم رکھنے والے خاندانوں کے لیے ہوں گے، جبکہ سابقہ بے گھروں کے لیے بھی مخصوص یونٹس شامل ہوں گے۔ اس کے ساتھ ہی 28,000 اسکوائر فٹ پر مشتمل ایک نیا ثقافتی و آرٹس سینٹر بھی بنایا جائے گا، جس میں پرفارمنس، ریہرسل اور اسٹوڈیو اسپیس ہوگی۔تقریب سے خطاب کرتے ہوئے میئر ایڈمز نے کہا کہ یہ منصوبہ نیویارک کو رہائش اور کمیونٹی سرگرمیوں کے لیے بہترین شہر بنانے کی سمت ایک بڑا قدم ہے۔ ان کا کہنا تھا کہ براؤنز وِل کے باسیوں کو اب نہ صرف معیاری سستے گھر ملیں گے بلکہ ایک ایسا مرکز بھی فراہم ہوگا جہاں لوگ فنونِ لطیفہ اور ثقافتی سرگرمیوں میں حصہ لے سکیں گے۔ اس منصوبے کی مجموعی لاگت تقریباً 254 ملین ڈالر ہے، جس میں سے تقریباً 100 ملین ڈالر کی سبسڈی ایڈمز انتظامیہ نے دی ہے۔یہ منصوبہ ایڈمز انتظامیہ کے ہاؤسنگ ایجنڈے کا حصہ ہے جس کے تحت اب تک تقریباً 426,000 گھروں کو بنایا، محفوظ یا منصوبہ بند کیا جا چکا ہے۔ حکام کے مطابق براؤنز وِل کا یہ نیا ماڈل نہ صرف سستی رہائش فراہم کرے گا بلکہ مقامی ثقافتی اور تخلیقی سرگرمیوں کو بھی فروغ دے گا۔ ایچ پی ڈی کے قائم مقام کمشنر احمد تیگانی نے کہا کہ یہ منصوبہ براؤنز وِل پلان کی عملی شکل ہے جس کے تحت 2,500 سے زائد سستے گھروں اور صحت، ثقافت اور عوامی جگہوں میں سرمایہ کاری کا وعدہ کیا گیا تھا۔اس منصوبے کو ماحولیاتی طور پر بھی جدید طرز پر ڈیزائن کیا گیا ہے، جس میں آل الیکٹرک بلڈنگ کا ماڈل اپنایا گیا ہے اور اسے نیویارک اسٹیٹ انرجی ریسرچ اینڈ ڈویلپمنٹ اتھارٹی (NYSERDA) کا بلو ربن ایوارڈ برائے ڈیزائن ایکسیلینس بھی مل چکا ہے۔ تعمیر جولائی 2025 میں شروع ہوگی اور دسمبر 2027 تک مکمل ہونے کی توقع ہے۔ماہرین کے مطابق یہ منصوبہ صرف رہائش نہیں بلکہ ایک ایسا کمیونٹی حب ہوگا جو مکینوں کو پائیدار مستقبل، تخلیقی مواقع اور باہمی تعلقات فراہم کرے گا۔ ایڈمز انتظامیہ کا دعویٰ ہے کہ یہ اقدام ان کے ’’سٹی آف یَس‘‘ ہاؤسنگ وژن کا حصہ ہے، جو نیویارک کے ہزاروں خاندانوں کے لیے نئے مواقع پیدا کرے گا۔