ایران کے سفیر برائے پاکستان رضا امیری مقدم نے اعلان کیا ہے کہ ایرانی وفد آج رات اسلام آباد پہنچے گا جہاں 10 نکاتی امن منصوبے کے تحت اہم مذاکرات کیے جائیں گے۔ ان کا کہنا ہے کہ ایران اس منصوبے کو عملی شکل دینے کے لیے سنجیدہ ہے اور پاکستان کے ساتھ سفارتی روابط کو مزید مضبوط بنانے کا خواہاں ہے۔
رپورٹس کے مطابق یہ پیش رفت ایسے وقت میں ہو رہی ہے جب پاکستان کی کوششوں سے امریکا اور ایران کے درمیان دو ہفتوں کی جنگ بندی ممکن ہوئی ہے۔ امریکی وفد کی قیادت جے ڈی وینس کریں گے، جبکہ ٹیم میں ڈونلڈ ٹرمپ کے قریبی مشیر بھی شامل ہوں گے۔ ذرائع کے مطابق دونوں ممالک کے درمیان مذاکرات کا پہلا دور اسلام آباد میں متوقع ہے۔دوسری جانب ایرانی میڈیا کے مطابق لبنان پر اسرائیلی حملوں کے بعد ایران نے آبنائے ہرمز کو بند کر دیا ہے اور تیل بردار جہازوں کی آمدورفت روک دی گئی ہے۔ اس اہم بحری راستے کی بندش سے عالمی توانائی مارکیٹ پر اثرات پڑنے کا خدشہ ظاہر کیا جا رہا ہے۔ایرانی حکام نے خبردار کیا ہے کہ اگر اسرائیل کی جانب سے حملے جاری رہے تو جنگ بندی معاہدہ خطرے میں پڑ سکتا ہے۔ رپورٹس کے مطابق ایران اس صورتحال کا جائزہ لے رہا ہے اور آئندہ حکمت عملی پر غور جاری ہے۔تجزیہ کاروں کے مطابق ایک جانب اسلام آباد میں مذاکرات کی امیدیں بڑھ رہی ہیں، تو دوسری جانب آبنائے ہرمز کی بندش خطے میں کشیدگی کو مزید بڑھا سکتی ہے، جس کے باعث آنے والے دن نہایت اہم قرار دیے جا رہے ہیں۔