امریکی صدر ڈونلڈ ٹرمپ نے اعلان کیا ہے کہ اٹارنی جنرل پام بونڈی کو عہدے سے ہٹا دیا گیا ہے، جس کے ساتھ ہی ان کی متنازع مدت کا اختتام ہو گیا۔
بونڈی کو ٹرمپ کی قریبی اتحادی سمجھا جاتا تھا اور ان کے دور میں محکمہ انصاف میں بڑے پیمانے پر تبدیلیاں دیکھنے میں آئیں۔رپورٹس کے مطابق بونڈی نے اپنے دور میں سینکڑوں سرکاری وکلاء اور افسران کو برطرف کیا جبکہ متعدد ملازمین نے خود استعفیٰ دے دیا۔ ان پر الزام تھا کہ انہوں نے محکمہ انصاف کو سیاسی مقاصد کے لیے استعمال کیا اور ٹرمپ کے مخالفین کے خلاف تحقیقات شروع کیں، جس پر شدید تنقید سامنے آئی۔ان کی برطرفی ایسے وقت میں ہوئی ہے جب جیفری ایپسٹین کیس سے متعلق فائلز کے معاملے پر بھی انہیں سخت تنقید کا سامنا تھا۔ ناقدین کا کہنا تھا کہ وہ اس معاملے کو مؤثر انداز میں سنبھالنے میں ناکام رہیں، جبکہ بعض تحقیقات عدالتوں میں مسترد بھی ہوئیں۔اگرچہ بونڈی نے ان الزامات کو مسترد کرتے ہوئے مؤقف اپنایا کہ ان کا مقصد ادارے کی ساکھ بحال کرنا تھا، تاہم ان کی برطرفی کو ٹرمپ انتظامیہ میں جاری اندرونی کشیدگی اور محکمہ انصاف میں مسلسل تبدیلیوں کا حصہ قرار دیا جا رہا ہے۔