امریکا میں ایک دھاتی مصنوعات بنانے والی کمپنی کے صدر نے فوجی تنصیبات کے لیے جاری ہونے والے سرکاری ٹھیکوں میں بولیاں فکس کرنے کی سازش کا اعتراف جرم کر لیا ہے۔
امریکی محکمۂ انصاف کے مطابق ملزم نے کئی برس تک مقابلہ ختم کرنے اور طے شدہ قیمتوں پر ٹھیکے حاصل کرنے کے لیے دیگر کمپنیوں کے ساتھ مل کر منصوبہ بندی کی۔عدالتی دستاویزات کے مطابق نارتھ کیرولائنا سے تعلق رکھنے والے تھامس سی رولنز 2015 سے 2022 کے دوران ایک ایسی کمپنی کے سربراہ تھے جو ڈیفنس لاجسٹکس ایجنسی (DLA) کے تحت امریکی فوجی اڈوں کو سامان اور خدمات فراہم کرتی تھی۔ استغاثہ کے مطابق ملزم اور اس کے ساتھی پہلے سے طے کرتے تھے کہ کون سی کمپنی کم ترین بولی دے گی جبکہ دیگر شریک کمپنیاں دکھاوے کی زیادہ قیمت والی بولیاں جمع کراتیں تاکہ مقابلے کا تاثر برقرار رہے۔ اس سازش کے نتیجے میں تقریباً 85 لاکھ ڈالر سے زائد کے ٹھیکے حاصل کیے گئے۔ملزم نے شرمین ایکٹ کے تحت بولی میں ملی بھگت کے جرم کا اعتراف کیا ہے، جس کی زیادہ سے زیادہ سزا 10 سال قید اور 10 لاکھ ڈالر جرمانہ ہو سکتی ہے۔ سزا کا حتمی فیصلہ وفاقی جج امریکی رہنما اصولوں اور قانونی عوامل کو مدِنظر رکھتے ہوئے سنائیں گے۔