نیویارک(ویب ڈیسک) نیویارک سٹی کے میئر زوہران ممدانی نے بلیک ہسٹری منتھ کے موقع پر کوئنز کے علاقے کورونا میں واقع لوئس آرمسٹرانگ ہاؤس میوزیم کا دورہ کیا اور اعلان کیا کہ 7 فروری کو تمام نیویارک کے شہریوں کے لیے میوزیم میں داخلہ مفت ہوگا۔
نیویارک میئر آفس کی آفیشل ویب سائٹ پر جاری خبر کے مطابق میئر ممدانی کے اس اقدام کا مقصد سیاہ فام تاریخ اور ثقافتی ورثے کو زیادہ سے زیادہ لوگوں تک پہنچانا ہے۔میئر ممدانی نے کہا کہ لوئس آرمسٹرانگ نہ صرف جاز موسیقی کے علمبردار تھے بلکہ امریکی ثقافت کی ایک عالمی علامت بھی تھے، اور ان کی زندگی اور خدمات کو عوام کے لیے قابلِ رسائی بنانا شہر کی ثقافتی ذمہ داری ہے۔ انہوں نے میوزیم کی کوششوں کو سراہا جو آرمسٹرانگ کی زندگی، موسیقی اور ورثے کو محفوظ رکھے ہوئے ہیں۔لوئس آرمسٹرانگ ہاؤس میوزیم اسی گھر میں قائم ہے جہاں عظیم موسیقار اپنی اہلیہ کے ساتھ تقریباً 30 برس مقیم رہے۔ میوزیم میں ان کے ذاتی سامان، نایاب ریکارڈنگز اور تاریخی دستاویزات محفوظ ہیں، جبکہ یہاں تعلیمی پروگرامز اور ثقافتی سرگرمیاں بھی منعقد کی جاتی ہیں۔ انتظامیہ کے مطابق مفت داخلے کا دن کمیونٹی کو اس تاریخی ورثے سے جوڑنے کا اہم موقع فراہم کرے گا۔