نارتھ کیرولائنا کے شہر شارلٹ کے رہائشی 32 سالہ مورس ہاپکنز کو وفاقی شہری حقوق کی خلاف ورزی کے جرم میں 40 ماہ قید کی سزا سنا دی گئی ہے۔
عدالت کے مطابق ملزم نے نسل، رنگ، مذہب اور قومی شناخت کی بنیاد پر آٹھ افراد کو تشدد کی دھمکیاں دیں، جس پر اس نے اگست 2025 میں جرم قبول کیا تھا۔عدالتی ریکارڈ کے مطابق 8 جون 2024 کو ہاپکنز نے ایک پیزا ریسٹورنٹ میں آتشیں اسلحے کے ذریعے آٹھ افراد کو ہراساں کیا۔ اس نے متاثرین سے پوچھا کہ آیا وہ امریکی ہیں، پھر انہیں دہشت گرد کہہ کر مخاطب کیا، انگریزی بولنے کا مطالبہ کیا اور ملک چھوڑنے کی دھمکیاں دیں۔ ملزم نے بار بار تشدد اور قتل کی دھمکیاں دیں اور چند منٹ بعد ایک بھری ہوئی اے آر-15 طرز کی رائفل کے ساتھ دوبارہ ریسٹورنٹ میں داخل ہوا، جس کے بعد متاثرین جان بچا کر فرار ہو گئے۔استغاثہ کے مطابق ہاپکنز نے اعتراف کیا کہ اس نے محض متاثرین کی شناخت کی بنیاد پر انہیں تشدد کی دھمکیاں دیں اور انہیں ایک عوامی مقام پر موجود سہولیات سے لطف اندوز ہونے سے روکنے کی کوشش کی۔ محکمہ انصاف کا کہنا ہے کہ اس نوعیت کے نفرت انگیز اور پرتشدد اقدامات کے خلاف وفاقی قانون پوری سختی سے نافذ کیا جائے گا۔