آئرلینڈ حکومت نے 2026 کے تعلیمی سال کے لیے مکمل فنڈڈ اسکالرشپس کا اعلان کر دیا ہے۔ اسکالرشپس سے دنیا بھر کے امیدوار فائدہ اٹھا سکیں گے۔
آئرش حکومت کے اس اسکالرشپ پروگرام کا مقصد ایسے طلبہ کو مواقع فراہم کرنا ہے جو معیاری اور بین الاقوامی معیار کی تعلیم حاصل کرنا چاہتے ہیں مگر مالی وسائل کی کمی رکاوٹ بن جاتی ہے۔ یہ اسکالرشپس یورپی یونین کے علاوہ دیگر ممالک کے طلبہ کے لیے بھی دستیاب ہوں گی، جس سے دنیا بھر کے امیدوار فائدہ اٹھا سکیں گے۔اس پروگرام کے تحت انڈرگریجویٹ، پوسٹ گریجویٹ اور پی ایچ ڈی سطح پر تعلیم حاصل کرنے کا موقع دیا جائے گا، جبکہ ایم ایس سے پی ایچ ڈی تک کے مختلف پروگرامز بھی اس اسکیم میں شامل ہیں۔ منتخب امیدواروں کو تعلیم کے ساتھ ساتھ رہائش اور روزمرہ اخراجات کے لیے بھی مالی معاونت فراہم کی جائے گی، تاکہ وہ یکسو ہو کر اپنی تعلیم اور تحقیق پر توجہ دے سکیں۔اسکالرشپ کے تحت طلبہ کو سالانہ 19 ہزار یورو بطور وظیفہ دیا جائے گا، جبکہ ٹیوشن فیس کی مد میں سالانہ 5,750 یورو تک مکمل ادائیگی کی جائے گی، جس میں نان ای یو فیس بھی شامل ہے۔ اس کے علاوہ تحقیقی سرگرمیوں کے لیے سالانہ 3,250 یورو کی اضافی مالی معاونت بھی فراہم کی جائے گی۔تعلیمی شعبوں کے حوالے سے یہ اسکالرشپ صرف سائنسی مضامین تک محدود نہیں بلکہ انجینئرنگ، انفارمیشن ٹیکنالوجی، بزنس، سماجی علوم، آرٹس اور ہیومینٹیز سمیت مختلف شعبہ جات کو بھی شامل کیا گیا ہے۔اس پروگرام میں آئرلینڈ کی متعدد عالمی شہرت یافتہ جامعات شامل ہیں، جہاں جدید تحقیق، انڈسٹری روابط اور بین الاقوامی تعلیمی ماحول میسر ہے۔دلچسپی رکھنے والے امیدواروں کو ہدایت کی گئی ہے کہ وہ 12 مارچ 2026 تک آئرش حکومت کے آفیشل آن لائن اسکالرشپ پورٹل کے ذریعے اپنی درخواستیں جمع کروائیں۔