بیجنگ: پاکستان اور چین نے دہشت گردی کے خلاف تعاون مزید مضبوط کرنے اور سی پیک منصوبوں کو آگے بڑھانے پر اتفاق کیا ہے۔
یہ فیصلے چینی وزیر خارجہ وانگ ای اور پاکستان کے نائب وزیراعظم و وزیر خارجہ اسحاق ڈار کی مشترکہ صدارت میں ساتویں پاک-چین اسٹریٹجک ڈائیلاگ کے دوران طے پائے۔اعلامیے کے مطابق ملاقات میں جنوبی ایشیا میں امن و استحکام، تنازعات کے پرامن حل اور مسئلہ کشمیر کے سلسلے میں اقوام متحدہ کی قراردادوں کی اہمیت پر زور دیا گیا۔ پاکستان نے ون چائنا پالیسی کے تحت تائیوان، سنکیانگ، تبت، ہانگ کانگ اور جنوبی بحیرۂ چین پر چین کی مکمل حمایت کا اعادہ کیا جبکہ چین نے پاکستان کی خود مختاری، علاقائی سالمیت اور دہشت گردی کے خلاف اقدامات میں بھرپور تعاون کا اعلان کیا۔دونوں ممالک نے دفاعی اور سکیورٹی تعاون، تجارت، سرمایہ کاری، عوامی روابط اور اسٹریٹجک رابطوں کو بڑھانے پر تفصیلی تبادلہ خیال کیا۔ اس موقع پر پاک چین تعلقات کے 75 سال مکمل ہونے کی تقریبات 2026 میں شروع کرنے کا بھی اعلان کیا گیا۔اعلامیے میں دونوں جانب سے خلائی تعاون، پاکستانی خلابازوں کی چینی خلائی اسٹیشن میں شمولیت، سی پیک 2، زراعت، معدنیات اور گوادر پورٹ پر تعاون بڑھانے کے اقدامات پر اتفاق کیا گیا۔ پاکستان نے چین کی ترقیاتی کامیابیوں کو سراہا اور دہشت گردی کے خلاف زیرو ٹالرنس پالیسی کے تحت دوطرفہ سکیورٹی تعاون مزید بڑھانے پر اتفاق کیا گیا۔