جدہ: پنجاب کے وزیر جیل خانہ جات رانا منان خان کی عمرہ کی سعادت کے موقع پر مسلم لیگ ن سعودی عرب کے رہنماؤں چوہدری منیر احمد گجر اور رانا عبدللہ راجپوت کی جانب سے پر وقار عشائیہ کا انعقاد کیا گیا۔
اس تقریب میں مرکزی جنرل سیکرٹری اور فوکل پرسن پرائم منسٹر یوتھ پروگرام ملک منظور حسین، لیگی عہدیداروں، کارکنوں، پاک کمیونٹی کی سرکردہ شخصیات، پاکستان انوسٹر فورم اور میڈیا نمائندگان نے بھرپور شرکت کی۔مہمان خصوصی رانا منان خان نے میزبانوں ملک منظور حسین، چوہدری منیر گجر اور رانا عبدللہ راجپوت کا شکریہ ادا کیا اور کہا کہ پاکستان ترقی کی راہ پر گامزن ہے، مہنگائی کم ہو رہی ہے اور خوشحالی کے منصوبے شروع ہو چکے ہیں۔ انہوں نے بتایا کہ جیلوں میں قیدیوں کو سہولیات اور ہنر سکھانے کے منصوبے جاری ہیں اور اوورسیز پاکستانیوں کے لیے بھی شاندار منصوبے لاگو کیے جا رہے ہیں۔ رانا منان خان نے پاکستان اور سعودی عرب کے لازوال روحانی تعلقات کی بھی تعریف کی۔تقریب سے خطاب کرتے ہوئے ملک منظور حسین، چوہدری بلو شیر وڑائچ اور چوہدری منیر گجر نے رانا منان خان کو عمرہ کی سعادت پر مبارک باد دی اور مسلم لیگ ن اور جیلوں میں اصلاحات کے لیے ان کی خدمات کو سراہا۔ بعد ازاں صحافیوں سے گفتگو میں رانا منان خان نے وزیر اعلیٰ پنجاب کی کارکردگی کو سراہا اور کہا کہ مسلم لیگ ن کی قیادت میں تمام مسائل جلد حل کیے جائیں گے۔تقریب کے دوران احمد خان سواتی نے تلاوت کلام پاک کی سعادت حاصل کی، کیک کاٹا گیا اور پاکستان و سعودی عرب کی ترقی و خوشحالی کے لیے دعا کی گئی۔ تمام مہمانوں کی پر تکلف عشائیہ سے تواضع کی گئی۔