امریکی صدر ڈونلڈ ٹرمپ اور یوکرین کے صدر ولادیمیر زیلنسکی نے کہا ہے کہ دونوں ممالک یوکرین میں جنگ کے خاتمے کے لیے مجوزہ امن منصوبے پر تقریباً اتفاق کے قریب پہنچ چکے ہیں۔
خبر رساں ادارے سی بی ایس کے مطابق فلوریڈا میں مار-اے-لاگو میں ہونے والی ملاقات کے بعد دونوں رہنماؤں نے بتایا کہ 20 نکاتی امن پلان پر 90 فیصد اتفاق ہو چکا ہے، تاہم مشرقی یوکرین کے متنازع علاقے ڈونباس سے متعلق امور اب بھی سب سے مشکل مسئلہ ہیں۔صدر ٹرمپ نے کہا کہ ملاقات سے قبل ان کی روسی صدر ولادیمیر پیوٹن سے “اچھی اور نتیجہ خیز” فون پر بات ہوئی، جس میں انہوں نے واضح پیغام دیا کہ جنگ ختم کرنے کے لیے معاہدہ ناگزیر ہے۔ ٹرمپ کے مطابق انہیں یقین ہے کہ ایک ایسا معاہدہ ممکن ہے جو یوکرین اور خطے کے لیے بہتر ثابت ہو۔ زیلنسکی نے بھی امن عمل میں پیش رفت کا خیرمقدم کرتے ہوئے یوکرین کے لیے مضبوط سیکیورٹی ضمانتوں پر زور دیا۔مشترکہ پریس کانفرنس میں بتایا گیا کہ اس عمل میں یورپی ممالک کا کردار کلیدی ہوگا اور امریکہ یورپ کے ساتھ مل کر سیکیورٹی انتظامات پر کام کرے گا۔ ٹرمپ نے کہا کہ اگر مذاکرات اچھی سمت میں بڑھے تو چند ہفتوں میں نتائج سامنے آ سکتے ہیں، تاہم انہوں نے اس امکان کا بھی ذکر کیا کہ عمل پیچیدہ ہو سکتا ہے۔ملاقات میں امریکہ اور یوکرین کے اعلیٰ حکام کے علاوہ یورپی رہنماؤں سے بھی رابطے کیے گئے۔ زیلنسکی نے عالمی برادری سے یوکرین کی حمایت جاری رکھنے کی اپیل کی، خاص طور پر ایسے وقت میں جب روسی حملے بدستور جاری ہیں۔