کراچی — کراچی پریس کلب کے سالانہ انتخابات برائے 2026 میں دی ڈیموکریٹس پینل نے ایک بار پھر بھرپور کامیابی حاصل کرتے ہوئے مسلسل 18ویں مرتبہ کلین سویپ کر لیا۔
ہفتہ کے روز ہونے والے انتخابات میں مختلف پینلز اور آزاد امیدواروں کے مابین مقابلہ رہا، تاہم نتائج دی ڈیموکریٹس پینل کے حق میں واضح رہے۔پولنگ کا آغاز صبح 9 بجے ہوا جو بلا تعطل شام ساڑھے 5 بجے تک جاری رہی۔ انتخابی عمل کے دوران کراچی پریس کلب کے اراکین کی بڑی تعداد نے جوش و خروش کے ساتھ ووٹنگ میں حصہ لیا۔ الیکشن کمیٹی کے سربراہ ڈاکٹر توصیف احمد خان نے کراچی پریس کلب میں نتائج کا باضابطہ اعلان کیا۔جاری کردہ نتائج کے مطابق دی ڈیموکریٹس پینل کے فاضل جمیلی 536 ووٹ حاصل کر کے صدر منتخب ہوئے، جبکہ اسلم خان نے 493 ووٹ لے کر سیکریٹری کے عہدے پر کامیابی حاصل کی۔ نائب صدر کے عہدے پر ارشاد کھوکھر 480 ووٹ کے ساتھ منتخب ہوئے، خازن کے عہدے پر عمران ایوب نے 622 ووٹ حاصل کیے، جبکہ جوائنٹ سیکریٹری کے منصب پر فاروق سمیع 556 ووٹ لے کر کامیاب قرار پائے۔گورننگ باڈی کی سات نشستوں پر عبدالجبار ناصر، اختر حسین سومرو، شیما صدیقی، فریال عارف، جاوید صباء، سید فرید عالم اور جاوید مہر منتخب ہوئے۔ انتخابات میں دی ڈیموکریٹس، ڈیموکریٹ، گرین پینل اور آزاد امیدواروں کے درمیان مقابلہ رہا۔ کراچی پریس کلب کے 1369 رجسٹرڈ ووٹرز میں سے 1011 اراکین نے اپنے حقِ رائے دہی کا استعمال کیا۔