سابق ڈی جی آئی ایس آئی لیفٹیننٹ جنرل ریٹائرڈ فیض حمید کو فیلڈ جنرل کورٹ مارشل نے 14 سال قیدِ بامشقت کی سزا سنادی ہے۔
پاک فوج کے شعبۂ تعلقاتِ عامہ (آئی ایس پی آر) کے مطابق لیفٹیننٹ جنرل ریٹائرڈ فیض حمید کے خلاف پاکستان آرمی ایکٹ کے تحت فیلڈ جنرل کورٹ مارشل کی کارروائی 15 ماہ تک جاری رہی۔ اس کارروائی کے دوران ملزم کے خلاف چار الزامات کی بنیاد پر سماعت کی گئی، جن میں سیاسی سرگرمیوں میں ملوث ہونا، آفیشل سیکریٹ ایکٹ کی خلاف ورزی، اختیارات اور سرکاری وسائل کا غلط استعمال، اور متعلقہ افراد کو ناجائز نقصان پہنچانا شامل تھے۔آئی ایس پی آر کے مطابق تفصیلی اور محنت طلب قانونی کارروائی کے بعد عدالت نے سابق جنرل کو تمام الزامات میں قصوروار قرار دیا۔ فیلڈ جنرل کورٹ مارشل نے مکمل قانونی تقاضے پورے کیے اور ملزم کو اپنے دفاع کے لیے وکلا کی ٹیم منتخب کرنے سمیت تمام قانونی حقوق فراہم کیے گئے۔ترجمان پاک فوج نے کہا کہ سیاسی عناصر کے ساتھ مبینہ روابط، سیاسی عدم استحکام اور افراتفری سے متعلق معاملات الگ سے دیکھے جا رہے ہیں۔لیفٹیننٹ جنرل ریٹائرڈ فیض حمید ماضی میں ڈی جی آئی ایس آئی اور کور کمانڈر پشاور کے عہدوں پر ذمہ داریاں ادا کر چکے ہیں۔