جدہ میں میمن ویلفیئر سوسائٹی ماسا کی تیرھویں سالانہ تعلیمی تقریبِ انعامات و اسناد اور سالانہ ایدھی ایوارڈ کی پُروقار تقریب منعقد ہوئی جس میں نمایاں تعلیمی کارکردگی دکھانے والے طلبہ و طالبات کو ایوارڈز اور سرٹیفکیٹس سے نوازا گیا۔
تقریب کا آغاز تلاوتِ قرآن پاک سے ہوا جس کی سعادت مریم فرحان نے حاصل کی جبکہ ترجمہ زرمین احمد نے پیش کیا، نعتِ رسولِ مقبول ﷺ علی خالد نے پیش کی۔ نظامت کے فرائض عمران مسقطیہ نے انجام دیے۔ماسا کے صدر وسیم عبدالرزاق طائی نے خطبہ استقبالیہ پیش کرتے ہوئے منتخب طلبہ و طالبات کو مبارکباد دی اور ان کی تعلیمی کارکردگی کو سراہا۔ جنرل سیکرٹری صادق سوراٹھیا نے نوجوان نسل کو مخاطب کرتے ہوئے کہا کہ علم کے بغیر عمل اور تعلیم کے بغیر تربیت بے معنی ہے۔تقریب کے مہمانِ خصوصی قونصل جنرل پاکستان جدہ خالد مجید تھے جنہوں نے ماسا کے تمام ممبران کو کامیاب تقریب کے انعقاد پر مبارکباد دی اور نمایاں کارکردگی دکھانے والے طلبہ و طالبات کی حوصلہ افزائی کی۔ گیسٹ آف آنر کے طور پر ورلڈ میمن آرگنائزیشن سے کامران غنی اور شبانہ اے رزاق نے شرکت کی اور ماسا کے عہدیداران و ممبران کو ان کی سماجی و فلاحی خدمات پر خراجِ تحسین پیش کیا۔اس موقع پر معروف سماجی رہنما عبد الستار ایدھی کو انسانی خدمت کے جذبے پر خراجِ عقیدت پیش کیا گیا جبکہ سال 2025 کے لیے ایدھی ایوارڈ خالد اسکندر کے نام کا اعلان کیا گیا، جو قونصل جنرل خالد مجید نے اپنے دستِ مبارک سے تفویض کیا۔ تقریب کے اختتام پر ماسا کے صدر، نائب صدر اور جنرل سیکرٹری نے تمام اسپانسرز، میڈیا نمائندگان اور رضاکاروں کا شکریہ ادا کیا جن کی محنت سے تقریب کامیاب اور یادگار ثابت ہوئی۔ آخر میں تمام مہمانوں کے اعزاز میں پرتکلف عشائیے کا اہتمام کیا گیا۔